2016-09-08 11:11:26, 697 ნახვა

---

"2012 წლის ძალადობისა და კორცხელის ინციდენტის ერთ დონეზე დაყენება, ნატო-ს წარმომადგენლებისთვის ღიმილის მომგვრელია"

საქართველოს პარლამენტის თავმჯდომარის დავით უსუფაშვილის განცხადებით, ნატო-ს გენერალურ მდივანთან და ჩრდილოატლანტიკური საბჭოს წევრებთან  წინასაარჩევნოდ არსებულ  არანაირ ძალადობრივ ფაქტებზე არ უსაუბრია.

როგორც მან ჟურნალისტებს განუცხადა, ყველაფერი, რაც საქართველოში ხდება, ნატო-სთვის ცნობილია. უსუფაშვილის განმარტებით, 2012  წლის წინასაარჩევნო კამპანიის, ძალადობისა და კორცხელის ინციდენტის ერთ დონეზე დაყენება, ნატო-ს წევრი სახელმწიფოების წარმომადგენლებისთვის ღიმილის მომგვრელია:

„არანაირ ძალადობრივ ფაქტებზე არ ყოფილა საუბარი და ვერც  იქნებოდა, რადგან  ეს ის ქვეყნები არიან, რომლებმაც ძალიან კარგად იციან, რა ხდება საქართველოში და ვინ და ვინ და ნატო-მ იცის კარგად, რა ხდება საქართველოში, გასაგები მიზეზების გამო. ამიტომ, შედარება 2012 წლის წინასაარჩევნო კამპანიასთან, ძალადობასთან, უბედურებასთან, რაც გადავიარეთ და ახლა 2 თვის წინ კორცხელში მომხდარი  ინციდენტის ერთ დონეზე დაყენება, ეს ღიმილის მომგვრელია ბევრისთვის, მათ  შორის ნატო-ს წევრი სახელმწიფოების წარმომადგენლებისთვის. ეს არ ნიშნავს იმას, რომ ჩვენ მშვიდად უნდა ვიყოთ და გარანტირებულია ყველაფერი. პარლამენტმაც, მთავრობამაც ყველამ ყველაფერი  უნდა გავაკეთოთ იმისათვის, რომ  წინასაარჩევნო გარემო სათანადო იყოს, არ იყოს არანაირი პრობლემა, მაგრამ რაიმე პარალელები იმასთან, რა იყო 2012 წელს და რა არის ახლა, არასერიოზულია და ამიტომ, ამას არც ერთი   ნატო-ს წევრი სახელმწიფო  არ იკადრებს და არ კადრულობს. რაც შეეხება სასამართლოში არსებულ საკითხებს,  აქ სტოლტენბერგმაც და სხვებმაც ხაზი გაუსვეს, მიესალმენ იმ წინგადადგმულ ნაბიჯებს, რაც გაკეთდა, მაგრამ  ამბობენ, რომ დიახ, ჩვენც ვხედავთ, რომ გასაკეთებელი ჯერ კიდევ ბევრია.  ეს ასეა. მაგალითად, პარლამენტმა ვერ შევძელით მესამე ტალღის რეფორმების კანონის მიღება და ბოლომდე მიყვანა. ეს ჩვენც ვიცით, მათაც იციან და, რა თქმა უნდა, ეს კარგი არაა“,-განაცხადა დავით უსუფაშვილმა.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი