გლობალური უსაფრთხოების ფორუმის მეორე დღეს ხიდაშელმა პარტნიორი ქვეყნების საგარეო საქმეთა მინისტრებთან შეხვედრები გამართა

2016-04-16 21:38:33, 438 ნახვა

პოლიტიკა

სლოვაკეთის დედაქალაქში მიმდინარე გლობალური უსაფრთხოების ფორუმის მეორე დღეს საქართველოს თავდაცვის მინისტრი ორმხრივ შეხვედრებს განაგრძობს. ლატვიის, ბოსნია და ჰერცეგოვინას და მოლდოვას საგარეო საქმეთა მინისტრებთან შეხვედრის მთავარი თემა პარტნიორ სახელმწიფოებთან ერთად საქართველოს ევროინტეგრაციის გზაზე გასავლელ პროცესს შეეხებოდა. როგორც თინათინ ხიდაშელმა აღნიშნა, ძალიან მნიშვნელოვანია ამ გზაზე ვხვდებოდეთ როგორც ევროკავშირის და ნატოს წევრი ქვეყნების, ასევე საქართველოს პარტნიორი ქვეყნების მინისტრებს, რათა დღეიდან საბოლოო შედეგის მიღწევამდე გასავლელი სტრატეგია დაიგეგმოს.

ლატვიის პირველ დიპლომატთან ედგარს რინკევიჩთან შეხვედრაზე ევრო-ატლანტიკურ სტრუქტურებში ინტეგრაციის პროცესში საქართველოს მიმართ ლატვიის სრულ მხარდაჭერაზე გამახვილდას ყურადღება.

ბოსნია და ჰარცეგოვინას საგარეო საქმეთა მინისტრთან შეხვედრაზე ხაზი გაესვა ქვეყნებს შორის ორმხრივი ურთიერთობების განვითარებას. „ბოსნია და ჰერცეგოვინა პარტნიორი ქვეყნების იმავე ჯგუფშია, რომელშიც საქარველო. ამიტომ მნიშვნელოვანია, ერთობლივად დავგეგმოთ სამოქმედო ნაბიჯები მომავალი სამიტების კონტექსტში, რაზეც შევთანხმდით,“ - განაცხადა თინათინ ხიდაშელმა.

„მოლდოვასთან უამრავი საერთო პრობლემა, საერთო წარმატება გვაერთიანებს. ქართულმა სახელმწიფომ, განსაკუთრებით თავდაცვის ტრანსფორმაციაში, ძალიან ბევრი გააკეთა, რაც შესაძლებელია გამოყენებული იყოს მოლდოვას მიერ. მათი მხრიდან არის სურვილი და მზაობა, რომ ითანამშრომლონ ამ მიმართულებით. საქართველოში იყო მოლდოვას თავდაცვის მინისტრი და ჩვენ დეტალურად გავიარეთ ეს თემები. მაისის ბოლოს ჩამოდის მოლდოვას საგარეო საქმეთა მინისტრი. დარწმუნებული ვარ, რომ ძალიან კონკრეტულ შედეგებს მივაღწევთ, თუ რითი შეიძლება საქართველო დაეხმაროს მოლდოვას,“ - ასე შეაჯამა საქართველოს თავდაცვის მინისტრმა მოლდოვას ვიცე-პრემიერთან და საგარეო უწყების ხელმძღვანელთან ანდრეი გალბურთან გამართული ორმხრივი შეხვედრა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან