AFP - „ჰამასი“ მზადაა, ისრაელთან დადებული ცეცხლის შეწყვეტის შეთანხმება კიდევ 4 დღით გაახანგრძლივოს

2023-11-29 13:26:08, 681 ნახვა

მსოფლიო

ტერორისტული დაჯგუფება „ჰამასი“ მზადაა, ისრაელთან დადებული ცეცხლის შეწყვეტის შეთანხმება კიდევ 4 დღით გაახანგრძლივოს. აღნიშნულის შესახებ ინფორმაციას Agence France Presse ავრცელებს.

AFP-ის ცნობით, „ჰამასმა“ ინიციატივის შესახებ შუამავლებს უკვე აცნობა და აღნიშნა, რომ ზავის გახანგრძლივების შემთხვევაში, მათ ისრაელელი ტყვეების გათავისუფლება შეეძლებათ.

„ჰამასმა“ შუამავლებს აცნობა, რომ იგი მზადაა, ზავი კიდევ 4 დღით გააგრძელოს, რათა არსებული ზავის პირობების მიხედვით, ისრაელის მიერ დაკავებული პატიმრების გათავისუფლება გაგრძელდეს", - წერს AFP.

გამოცემის ცნობითვე, არსებული შეთანხმების თანახმად, ტერორისტულმა დაჯგუფებამ ისრაელელი ბავშვები და ასევე ის ქალები უნდა გაათავისუფლოს, რომლებიც ისრაელის თავდაცვის ძალებში არ მსახურობდნენ.

როგორც გამოცემა წერს, ღაზაში ამ დროისთვის, მძევლად 9 ბავშვი რჩება, რომელთა შორის ყველაზე პატარა 10 თვისაა.

ცნობისთვის, მას შემდეგ, რაც 24 ნოემბერს ისრაელსა და "ჰამასს" შორის ცეცხლის შეწყვეტის შეთანხმება ამოქმედდა, ტერორისტული დაჯგუფების მიერ 7 ოქტომბერს, ღაზას სექტორში გატაცებული მძევლების გათავისუფლების რამდენიმე რაუნდი შედგა, რის სანაცვლოდაც ისრაელმა პალესტინელი პატიმრები გაათავისუფლა.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,