2022-02-27 13:37:12, 811 ნახვა

---

ლიზ ტრასი - უკრაინაზე თავდასხმა პუტინისთვის შეიძლება, დასასრულის დასაწყისი იყოს, მაგრამ მეშინია, რომ ეს კონფლიქტი წლები გაგრძელდება

რუსეთის სამხედრო თავდასხმა უკრაინაზე, პრეზიდენტ ვლადიმირ პუტინისთვის, „შეიძლება იყოს დასასრულის დასაწყისი“, განაცხადა დიდი ბრიტანეთის საგარეო საქმეთა მინისტრმა, ლიზ ტრასმა.

Sky News-თან საუბრის დროს, ლიზ ტრასმა აღნიშნა, რომ დიდი ბრიტანეთი უკრაინის „ძლიერ და მამაც წინააღმდეგობას“ აკვირდება და უკრაინელი სამხედროებისათვის იარაღის მიწოდებასა და ეკონომიკურ მხარდაჭერას კვლავ განაგრძობს.

მისივე თქმით, რუსეთის პრეზიდენტმა, ვლადიმერ პუტინმა „სტრატეგიული შეცდომა დაუშვა“ იმის გათვალისწინებით, თუ რამხელა ზიანს აყენებს დასავლეთის სანქციები რუსეთის ეკონომიკას.

„მეშინია, რომ ეს კონფლიქტი შეიძლება, რამდენიმე წლის განმავლობაში გაგრძელდეს და იყოს ძალიან სისხლიანი. უკრაინის ომი დიდ ბრიტანეთს „ეკონომიკურ ფასს“ გადაახდევინებს, თუმცა ბრიტანელი ხალხი მიხვდება იმ ფასს, რომელსაც გადავიხდით, თუ ახლა პუტინს წინააღმდეგობას არ გავუწევთ”, - დასძინა ლიზ ტრასმა.

გაერთიანებული სამეფოს სანქციებთან დაკავშირებით, საგარეო საქმეთა მინისტრმა აღნიშნა, რომ მან „ოლიგარქების სია შეადგინა“ და შეიძლება, რომ „სანქციების მოძრავი პროგრამაც“ ამოქმედდეს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი