პარლამენტი დღეს ე.წ. ფარულ მოსმენებთან დაკავშირებულ საკანონმდებლო პაკეტს მესამე მოსმენით განიხილავს, შემდეგ კი, დოკუმენტს კენჭს უყრიან.

აღნიშნულ საკითხზე პრეზიდენტის განკარგულებით, 12:00 საათზე პარლამენტის რიგგარეშე სხდომაა ჩანიშნული.

როგორც ცნობილია, პროტესტის ნიშნად „პატრიოტთა ალიანსის“ და „ევროპული საქართველოს“ წევრები კანონპროექტის მესამე მოსმენით განხილვაში მონაწილეობას არ მიიღებენ.

წარმოდგენილი კანონის პროექტი ითვალისწინებს საქართველოს სახელმწიფო უსაფრთხოების სამსახურის მმართველობის სფეროში საჯარო სამართლის იურიდიული პირის - საქართველოს ოპერატიულ-ტექნიკური სააგენტოს შექმნას, განსაზღვრავს მის სტატუსს, საქმიანობის ძირითად პრინციპებს, ფუნქციებსა და უფლებამოსილებებს. სააგენტოს ამოცანად განისაზღვრება კანონმდებლობით დადგენილი წესით უფლებამოსილი ორგანოს მიმართვის საფუძველზე, სპეციალური ტექნოლოგიური საშუალებების გამოყენებით, ფარული მეთოდებით საქართველოს კონსტიტუციური წყობილების, სუვერენიტეტის, თავდაცვისუნარიანობის, ტერიტორიული მთლიანობის, მართლწესრიგის წინააღმდეგ მიმართულ ქმედებათა შესახებ ინფორმაციის და სისხლის სამართლის საქმეზე ფაქტობრივი მონაცემების მოპოვება. აღნიშნული მიზნებისთვის უფლებამოსილი ორგანოს მიმართვის საფუძველზე სააგენტო უფლებამოსილი იქნება განახორციელოს სისხლის სამართლის საპროცესო კოდექსით გათვალისწინებული ცალკეული ფარული საგამოძიებო მოქმედებები, აგრეთვე სტრატეგიული და ინდივიდუალური მონიტორინგის ღონისძიებები. განისაზღვრება ფარული მეთვალყურეობის ღონისძიებების განხორციელების წესი და საფუძველი. შემოდის ზედამხედველი მოსამართლის ინსტიტუტი, რომელიც იქნება უზენაესი სასამართლოს მოსამართლე. კანონპროექტით წესრიგდება სააგენტოს მატერიალულ-ტექნიკურ უზრუნველყოფასთან, მისი  საქმიანობის კონტროლისა და ზედამხედველობის ფორმებთან დაკავშირებული საკითხები, აგრეთვე  გათვალისწინებულია გარდამავალი დებულებები, რომელიც არეგულირებს კანონის სრულყოფილად ამოქმედებასთან დაკავშირებულ ღონისძიებებს)

„ნდობის ჯგუფის შესახებ“ კანონში შესატანი ცვლილების თანახმად სსიპ – ოპერატიულ–ტექნიკური სააგენტო ყოველწლიურად წარუდგენს ნდობის ჯგუფს სტატისტიკურ და მის მიერ გაწეული საქმიანობის განზოგადებულ ანგარიშს. მომხსენებლის, ეკა ბესელიას განმარტებით, საქართველოს პარლამენტი სააგენტოს საქმიანობაზე კონტროლს ახორციელებს საპარლამენტო კონტროლის ფორმების გამოყენებით. მისივე თქმით, ნდობის ჯგუფი უფლებამოსილი იქნება, მიიღოს გადაწყვეტილება სააგენტოს საქმიანობის შემოწმების შესახებ.

„ნორმატიული აქტების შესახებ“ კანონში ცვლილება შედის, რომლის მიხედვით, საქართველოს მთავრობის უშუალო დაქვემდებარებაში არსებული დაწესებულების ხელმძღვანელის ნორმატიული აქტი შეიძლება გამოიცეს საქართველოს საკანონმდებლო აქტით და საქართველოს მთავრობის დადგენილებით განსაზღვრულ შემთხვევებსა და ფარგლებში.

უმცირესობის წარმომადგენლებს მიაჩნიათ, რომ შემოთავაზებული კანონპროექტი მთავრობაზე ახდენს დელეგირებას, რომ სახელმწიფო უსაფრთხოების სამსახურმა ნორმატიული აქტები გამოსცეს მთავრობის დადგენილებების ფარგლებშიც. ეს უმცირესობის წევრებისთვის მიუღებელია. „სამეწარმეო საქმიანობის კონტროლის შესახებ“ კანონპროექტით იმ საქმიანობათა ჩამონათვალს, რომელიც არ ჩაითვლება სამეწარმეო საქმიანობის კონტროლად, ემატება ოპერატიულ–ტექნიკური სააგენტოს მიერ განხორციელებული საინფორმაციო და სატელეკომუნიკაციო სისტემების უსაფრთხოების უზრუნველყოფის მიზნით ინფორმაციული ტექნოლოგიების აუდიტის ჩატარება.

ოპოზიციის წარმომადგენლები ფიქრობენ, რომ ეს გაზრდის საინფორმაციო და სატელეკომუნიკაციო ოპერატორების ხარჯებს. ეკა ბესელიას განცხადებით, აღნიშნულ საკითხზე დეტალური მსჯელობის მიზნით, იგი შეხვდება სატელეკომუნიკაციო კომპანიების წარმომადგენლებს.

კანონპროექტი „სალიცენზიო და სანებართვო მოსაკრებლების შესახებ“ განსაზღვრავს სალიცენზიო მოსაკრებლის განაკვეთს 200 ლარის ოდენობით, ელექტრონული კომუნიკაციების მონიტორინგის სისტემების დამზადების, იმპორტის ან ექსპორტის ლიცენზიისთვის.

პარლამენტის რეგლამენტში შედის ცვლილება. კერძოდ, უსაფრთხოების სამსახურის უფროსი ან მისი მოადგილე წელიწადში ერთხელ პარლამეტს წარუდგენს სამსახურის მიერ წინა წელს გაწეული საქმიანობის შესახებ ანგარიშს.

საკანონმდებლო პაკეტის ავტორი და ინიციატორები არიან უმრავლესობის დეპუტატები: ეკა ბესელია, არჩილ თალაკვაძე, მამუკა მდინარაძე, ირაკლი სესიაშვილი, გიორგი ვოლსკი, სოფიო კილაძე, ვანო ზარდიაშვილი, დავით მათიკაშვილი, ზვიად კვაჭანტირაძე, გედევან ფოფხაძე, გიორგი ხატიძე, ივლიანე წულაია, ლევან გოგიჩაიშვილი და გურამ მაჭარაშვილი.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

„ფორმულას" განცხადებით, დავალიანების გამო არხის ღია სიგნალით მაუწყებლობა შეწყდა

მედვედევმა ფაშინიანს და ზელენსკის „ორი უტვინო რუსოფობი“ უწოდა

ზელენსკიმ 5-6 მაისის ღამეს ცეცხლის შეწყვეტა გამოაცხადა

ჩერნობილის კატასტროფის სამაშველო სამუშაოების ხელმძღვანელმა და РХБЗ სამხედრო ძალების უფროსმა- გენერალმა თავი მოიკლა