„საქართველოსთვის“ - „ოცნება“ ე.წ აგენტების კანონს აინიცირებს, რათა არ მოგვცენ კანდიდატის სტატუსი და არჩევნები გააყალბონ

2023-02-27 11:29:57, 744 ნახვა

პოლიტიკა

„ოცნება" ე.წ აგენტების შესახებ კანონს აინიცირებს ერთადერთი მიზნით, რომ არ მოგვცენ კანდიდატის სტატუსი, გააყალბონ არჩევნები და შეინარჩუნონ ძალაუფლება,- ამის შესახებ პარტია „საქართველოსთვის“ თავმჯდომარის მოადგილე, ნათია მეზვრიშვილმა პარლამენტში, ცოტა ხნის წინ გამართულ საგანგებო ბრიფინგზე განაცხადა.

მისი თქმით, კანონი პირდაპირ ეწინააღმდეგება EU-ს 12 პუნქტიდან ორს და ველს უსუფთავებს ხელისუფლებას, რომ არჩევნები რეალური და სამართლიანი სადამკვირვებლო მისიის გარეშე ჩაატარონ.

„ოცნება" ე.წ აგენტების შესახებ კანონს აინიცირებს ერთადერთი მიზნით, რომ არ მოგვცენ კანდიდატის სტატუსი, გააყალბონ არჩევნები და შეინარჩუნონ ძალაუფლება.

კანდიდატის სტატუსის მიღების გადამწყვეტ ფაზაში, როცა მისი მიღების კარგი შესაძლებლობა არსებობს, კანონის ირგვლივ დისკუსიის გახსნაც კი ხელისუფლების მხრიდან არის ქვეყნის ინტერესების ღალატი. მოვუწოდებთ ოცნებას შეწყვიტონ დისკუსია და კონსტიტუციის დარღვევა.

ე.წ აგენტების კანონის ინიცირება მაშინ, როცა ევროკომისიამ კანონმდებლობა დადებითად შეგვიფასა და საზოგადოება ყველაფერს აკეთებს სტატუსის მისაღებად არის კანდიდატის სტატუსის საბოტაჟი. მსგავს კანონზე ევროკავშირის გადაწყვეტილების მიმღებმა ორგანოებმა უკვე არაერთხელ თქვეს, რომ ეწინააღმდეგება EU-ს პრინციპებს და არანაირი მნიშვნელობა არ აქვს რას დაარქმევს „ოცნება“ ამ კანონს და რამდენ ვერსიას დააინიცირებს.

სინამდვილეში კანონი პირდაპირ ეწინააღმდეგება EU-ს 12 პუნქტის მეშვიდე და მეათე პუნქტებს, ველს უსუფთავებს ხელისუფლებას, რომ არჩევნები რეალური და სამართლიანი სადამკვირვებლო მისიის გარეშე ჩაატარონ, აგენტის იარლიყს აკრავს ყველას, ვისი საქმიანობაც „ოცნების“ უკანონო ძალაუფლებისთვის საფრთხის შემცველია. კანონზე დისკუსიის გახსნის მიზანია, ყურადღების გადატანა 12 პუნქტიდან, რომელიც ჯერ კიდევ შეუსრულებელია.

კანონპროექტის ინიციატორს და ხმის მიმცემ თითოეულ დეპუტატს კი შევახსენებთ, იმ მძიმე და გარდაუვალ პასუხსისმგებლობას, რაც ქვეყნის ინტერესების ღალატს მოსდევს, პასუხისმგებლობას, რომელიც იქნება პერსონალიზირებული ვერც დამკვეთი და ვერც შემსრულებელი ვერ გაექცევა",- განაცხადა ნათია მეზვრიშვილმა.

შეგახსენებთ, ანტიდასავლურმა მოძრაობამ „ხალხის ძალამ" საქართველოს პარლამენტში „უცხოური გავლენის გამჭვირვალობის შესახებ“ კანონპროექტი დააინიცირა. კანონპროექტის მიხედვით, შეიქმნება უცხოური გავლენის აგენტების რეესტრი, სადაც დარეგისტრირდება ყველა ის არასამეწარმეო იურიდიული პირი და მედიასაშუალება, რომელთა შემოსავლების 20%-ზე მეტი უცხოური ძალების მიერ ფინანსდება.

ანტიდასავლურმა მოძრაობამ, ოპოზიციური პოლიტიკური სპექტრისა და საზოგადოების კრიტიკის შემდეგ, კანონპროექტის მეორე ვარიანტის ინიცირების გადაწყვეტილებაც მიიღო. ოპოზიცია ორივე ვარიანტს "რუსულ კანონს" უწოდებს, მმართველი პოლიტიკური გუნდი კი, ანტიდასავლური მოძრაობის კანონპროექტის მხარდამჭერია.