"გირჩი - მეტი თავისუფლება", "სტრატეგია აღმაშენებელი" და "დროა" ევროპარლამენტის საგარეო საქმეთა კომიტეტის ანგარიშს ეხმაურებიან და სპეციალურ განცხადებას ავრცელებენ. 

როგორც განცხადებაშია აღნიშნული, ანგარიშის მიხედვით ირკვევა, რომ ევროკომისიის 12 პუნქტთან მიმართებაში, წინსვლა არ აღინიშნება და უფრო მეტიც, მთელი რიგი ძირითადი მიმართულებებით უკუსვლა შეინიშნება. 

ოპოზიციის ნაწილი მიიჩნევს, რომ  "ქართული ოცნება" არ აპირებს ევროკომისიის მიერ ზაფხულში საქართველოსთვის დადგენილი 12 რეკომენდაციის შესრულებას, რითაც ევროკავშირის წევრობის კანდიდატის სტატუსზე მიზანმიმართულად უარს ამბობს.

"გირჩი - მეტი თავისუფლების", "სტრატეგია აღმაშენებლისა" და "დროას" ლიდერები შექმნილი ვითარებიდან გამოსავალს პროდასავლურად განწყობილი მოსახლეობის უმრავლესობისა და პოლიტიკური სპექტრის კონსოლიდაციაში ხედავენ.

ოპოზიციური პარტიების ერთობლივ განცხადებას "ექსპრესნიუსი" უცვლელად გთავაზობთ: 

"ევროპარლამენტის საგარეო საქმეთა კომიტეტის მიერ გუშინ მხარდაჭერილი ანგარიში ევროპული ოფიციალური სტრუქტურის მიერ მიღებული პირველი წერილობითი დოკუმენტია საქართველოს შესახებ, რომლითაც დასტურდება, რომ ქართული ოცნება არ აპირებს ევროკომისიის მიერ ზაფხულში ჩვენი ქვეყნისთვის დადგენილი 12 რეკომენდაციის შესრულებას, რითიც მიზანმიმართულად ამბობს უარს ევროკავშირის წევრობის კანდიდატის სტატუსზე. ანგარიშში აღნიშნულია, რომ ევროკომისიის 12 პუნქტთან მიმართებაში არანაირი წინსვლა არ აღინიშნება. უფრო მეტიც, მთელი რიგი ძირითადი მიმართულებებით ადგილი აქვს უკუსვლას.

ევროპარლამენტი კიდევ ერთხელ განმარტავს, რომ საქართველოში ერთადერთი ოლიგარქი არსებობს და რომ დე-ოლიგარქიზაცია ნიშნავს ყოფილი პრემიერ-მინისტრის, ბიძინა ივანიშვილის ჭარბი  გავლენების ამოძირკვას ქვეყნის  პოლიტიკური, ეკონომიკური და საზოგადოებრივი ცხოვრებიდან.  შესაბამისად, კანონის მიღება, რომელიც არ ეხება ბიძინა ივანიშვილს, არ ჩაითვლება დე-ოლიგარქიზაციის მუხლის შესრულებად.

ევროპული სტრუქტურის ოფიციალურ დოკუმენტში პირველად არის ჩაწერილი, რომ სახელმწიფო ინსტიტუტები მიტაცებულია და კორუფციასთან ბრძოლის მხრივ სტაგნაცია შეინიშნება. სასამართლო სისტემის რეფორმირების ნაცვლად, შეინიშნება რეგრესი მთელი რიგი მიმართულებებით, როგორიცაა იუსტიციის უმაღლესი საბჭოს წევრების დანიშვნა, ან უზენაესი სასამრთლოს მოსამართლეების ნომინირების პროცესი. 

ანგარიშში ნათქვამია, რომ ევროინტეგრაციის პროცესთან დაუშვებელია "ქართული ოცნების" ლიდერების მხრიდან აგრესიული თავდასხმები ევროპარლამენტარებზე, ასევე  ევროკავშირისა და აშშ ოფიციალურ პირებზე.  განსაკუთრებით ხაზგასმულია, რომ ევროინტეგრაციისთვის დამაზიანებელია ისეთი მავნე რიტორიკა, როგორიცაა „დასავლეთს უნდა საქართველოს ომში ჩათრევა“.

ევროპარლამენტი მოითხოვს საქართველოს ხელისუფლებისგან შეწყვიტოს პოლიტიკური მოტივებით ოპონენტების დევნა, რისი მკაფიო მაგალითიცაა კრიტიკული მედიის მფლობელების და მათი ოჯახების წინააღმდეგ წარმოებული სასამართლო საქმეები, ნიკა გვარამიას საქმე, ჯაფარიძე-ხაზარაძის საქმე. ასევე, მოთხოვნილია მიხეილ სააკაშვილის გათავისუფლება და ჰუმანიტარული მიზნებით, ადეკვატური მკურნალობისთვის მისი გადაყვანა სხვა ქვეყანაში.

ანგარიშში აღნიშნულია საქართველოში  მედიისა და გამოხატვის თავისუფლების მდგომარეობის გაუარესება გასულ წელს. ევროპარლამენტი მოითხოვს ტვ პირველის, ტვ მთავარისა და ტვ ფორმულას წინააღმდეგ მიმდინარე პოლიტიკური საქმეების დაუყოვნებლივ შეწყვეტას.

ანგარიშში ასახულია საარჩევნო სისტემის რეფორმის აუცილებლობა. აღნიშნულია არჩევნების პერიოდში ამომრჩეველზე ზეწოლა, ძალადობა, ხმის მოსყიდვა და სხვა ადმინისტრაციული რესურსების უკანონოდ გამოყენება. ანგარიში ითხოვს საქართველოს ხელისუფლებისგან, რომ დაცული და გარანტირებული იყოს საზღვარგარეთ მცხოვრები საქართველოს მოქალაქეების ხმის უფლება.

ცალკე პუნქტად არის აღნიშნული საქართველოს ხელისუფლების მხრიდან უკრაინის მხარდაჭერის აუცილებლობა და რუსეთისადმი დაწესებული სანქციების გვერდის ავლის შესაძლებლობების გამორიცხვა.

24 ივნისიდან 4 თვის თავზე, 12 რეკომენდაციის შესრულების ნაცვლად ქართულმა ოცნებამ საწინააღმდეგო ნაბიჯები გადადგა, კიდევ უფრო დაამძიმა ვითარება და კიდევ უფრო დაგვაშორა ევროპული ოჯახის წევრობის პერსპექტივას. შექმნილ ვითარებაში, ქვეყნის ევროპული მომავლის გადარჩენის გზა გადის პროდასავლურად განწყობილი მოსახლეობის უმრავლესობისა და პოლიტიკური სპექტრის კონსოლიდაციასა და ქართული ოცნების ხელისუფლებიდან მაქსიმალურად სწრაფად ჩამოცილებაზე", - ნათქვამია ზურაბ ჯაფარიძის, სერგო ჩიხლაძისა და ელენე ხოშტარიას ერთობლივ განცხადებაში.

ავტორი: ექსპრესნიუსი,

სოციალური ქსელები

საია - გავრცელებული შემაშფოთებელი კადრები სისტემური და სისტემატური საპოლიციო ძალადობის კიდევ ერთ ილუსტრაციას წარმოადგენს, რომელიც წლების განმავლობაში ავტორიტარული რეჟიმის ხელწერად იქცა

პირმა წარსულში არსებული დავის ნიადაგზე 2 კაცი მოკლა

ახმეტაში, შვილის გადარჩენის მცდელობისას მამაკაცი ტბაში დაიხრჩო

ბრიტანეთმა რუსული „ჩრდილოვანი ფლოტის“ ტანკერი დააკავა