„დღეისათვის მნიშვნელოვნად არის შემცირებული როგორც ინფიცირების, ისე ჰოსპიტალიზაციის რაოდენობა. აქვე უნდა აღვნიშნო სასიხარულო ფაქტი, გუშინ იყო პირველი დღე, როცა კოვიდით გარდაცვალება არ დაფიქსირებულა“, - განაცხადა ზურაბ აზარაშვილმა, ბათუმის რესპუბლიკურ საავადმყოფოში ვიზიტისას. 

ჯანდაცვის მინისტრი აჭარაში იმყოფება. ვიზიტის ფარგლებში, ის რესპუბლიკურ საავადმყოფოს ეწვია. ზურაბ აზარაშვილმა კლინიკა დაათვალიერა და იქ დასაქმებულ მედპერსონალს ჯანმრთელობის მსოფლიო დღე მიულოცა. მინისტრმა ბათუმის რესპუბლიკურ საავადმყოფოსთან დაკავშირებულ სამომავლო გეგმებზეც ისაუბრა. აღნიშნა, რომ კლინიკა მრავალპროფილური უნდა გახდეს და ადგილობრივ მაცხოვრებლებს უფრო მეტი სერვისი შესთავაზოს. 

,,დღეს არის ჯანმრთელობის მსოფლიო დღე და ვეწვიეთ აჭარას. შეხვედრა გვქონდა ადგილობრივ ჯანდაცვის სამინისტროში. შევხვდით მინისტრს და განვიხილეთ რეგიონის გამოწვევები ჯანდაცვის მიმართულებით, ასევე, თუ სად იყო ჩვენი მხარდაჭერის საჭიროება. ახლა ვიმყოფებით რესპუბლიკურ საავადმყოფოში, რომელიც წელიწად-ნახევარია გაიხსნა და იყო კოვიდკლინიკა. დღეისათვის, მნიშვნელოვნად არის შემცირებული როგორც ინფიცირების, ისე ჰოსპიტალიზაციის რაოდენობა. აქვე უნდა აღვნიშნო სასიხარულო ფაქტი, გუშინ იყო პირველი დღე, როცა კოვიდით გარდაცვალება არ დაფიქსირებულა. ამ კლინიკაში ახლა უკვე საჭიროა შესაბამისი აღჭურვილობა, რომ იყოს მრავალპროფილური, მოემსახუროს ადგილობრივ მაცხოვრებლებს და შესთავაზოს ყველა სამედიცინო სერვისი. შევთანხმდით, რომ უახლოეს კვირაში იქნება წარმოდგენილი სამოქმედო გეგმა, თუ რა არის საჭირო, ასევე შემოსავლების ნაწილში, როგორ შეიძლება კლინიკის შემოსავლები იყოს სტაბილური",- განაცხადა ზურაბ აზარაშვილმა. მანამდე, 

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი, აჭარის ჯანდაცვის მინისტრს ნინო ნიჟარაძეს შეხვდა. მხარეებმა ეკომიგრანტთა განსახლების საკითხები, ასევე - ჯანდაცვის კუთხით რეგიონში არსებული მდგომარეობა და გამოწვევები განიხილეს. შეხვედრაზე საუბარი შეეხო სამედიცინო სერვისების ხელმისაწვდომობის გაზრდის მექანიზმებს, ერთობლივ პროგრამებსა და სამომავლო გეგმებს. 

ჯანდაცვის მინისტრთან ერთად, აჭარის რეგიონში, მინისტრის მოადგილე ილია ღუდუშაური, დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორი ჯაბა სირბილაძე და სახელმწიფო სამედიცინო ჰოლდინგის დირექტორის მოვალეობის შემსრულებელი გვანცა გასვიანი იმყოფება. 

ავტორი: NS (სტატია დაფინანსებულია),

სოციალური ქსელები

ლონდონში ანტისემიტიზმის წინააღმდეგ მასობრივი მიტინგი გაიმართა

რეჟიმის წარმომადგენელი პაპუაშვილი - ფიშერის ფაილი დახურულია, გერმანიაში მის გამგზავრებას ველოდებით

საპატრიარქოში აცხადებენ, რომ საეკლესიო კრებაზე 1 200-მდე დელეგატი იქნება

პატრიარქის არჩევასთან დაკავშირებით, 11 მაისს, 09:00 საათიდან 18:00-მდე სამების მიმდებარე ტერიტორიაზე, რამდენიმე მიმართულებით საავტომობილო მოძრაობა შეიზღუდება