სასჯელაღსრულებისა და პრობაციის მინისტრმა კახა კახიშვილმა მინისტრის რანგში პირველი შეხვედრა საქართველოს სახალხო დამცველ უჩა ნანუაშვილთან გამართა.

სახალხო დამცველმა კახა კახიშვილს მინისტრის თანამდებობაზე დანიშვნა მიულოცა.

უწყების ინფორმაციით, დახურულ შეხვედრაზე მხარეებმა პენიტენციურ სისტემაში განხორციელებულ და მიმდინარე ცვლილებებზე ისაუბრეს, ასევე, შეეხნენ სახალხო დამცველის რეკომენდაციებსა და რეგულარულ ურთიერთთანამშრომლობაზე შეთანხმდნენ.

„ჩვენთვის ერთ-ერთი ძირითადი საერთო პრიორიტეტია მსჯავრდებულების უფლებების დაცვა. პრობლემის არსებობის შემთხვევაში, ყველაზე მთავარია ამ პრობლემის გარშემო კონსულტაციები, გამოსავალის ძიება და საჭირო ამოცანების დასახვა. სახალხო დამცველთან ერთად  შევთანხმდით, რომ ჩვენ მუდმივად, საჭიროებიდან გამომდინარე კვირაში ან 2 კვირაში ერთხელ გავმართავთ შეხვედრებს, სადაც ყველა მნიშვნელოვან საკითხს განვიხილავთ და დავსახავთ გზებს, რომლითაც შეგვიძლია სისტემის გაუმჯობესება. ვიმუშავებთ მუდმივი კონტაქტისა და ურთიერთთანამშრომლობის რეჟიმში“, - განაცხადა კახა კახიშვილმა.

უჩა ნანუაშვილის თქმით, შეხვედრაზე ყველა იმ პრობლემატურ საკითხს შეეხნენ, რომელიც სისტემაში არსებობს.

„სასიამოვნოა, რომ მინისტრმა პირველი სამუშაო დღის ნაწილი სწორედ სახალხო დამცველთან ვიზიტს დაუთმო და ეს არ არის მხოლოდ სიმბოლიზმი. მე იმედი მაქვს, რომ ჩვენი რეკომენდაციების შესრულების ხარისხი გაიზრდება და დავსახავთ კონკრეტულ გზებს, რათა ჩვენი თანამშრომლობა კიდევ უფრო ნაყოფიერი გახდეს“, - აღნიშნა ნანუაშვილმა.

შეხვედრას სახალხო დამცველის პირველი მოადგილე პაატა ბელთაძე და მოადგილე ნათია კაციტაძე ესწრებოდნენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპის ადმინისტრაციამ განაცხადა, რომ რუსეთის წინააღმდეგ სანქციები რამდენიმე ქვეყნის მოთხოვნის საფუძველზე შეამსუბუქა

ტრამპმა შეადგინა ნატოს „ურჩი“ ქვეყნების სია, რომლებიც ვაშინგტონის სურვილით, დაისჯებიან

საქართველო „ღია მმართველობის პარტნიორობიდან “ (OGP) გარიცხეს

გავარმიას ინფორმაციით, ბერა ივანიშვილის და კახი კალაძის სამეგობროს ჩხუბის შემდეგ, ივანიშვილის მეგობრები სუს-მა დააკავა