ნიკა მელიას დამატებითი კონტროლისთვის ელექტრონულ სამაჯურს დაუმაგრებენ

2019-07-02 12:50:20, 1600 ნახვა

სამართალი

თბილისის სააპელაციო სასამართლოში "ნაციონალური მოძრაობის" წევრის ნიკა მელიას სასამართლო პროცესი გაიმართა.

სასამართლოს საჩივრით დაცვის და ბრალდების მხარეებმა მიმართეს. ბრალდების მხარე მელიასთვის გირაოს ნაცვლად, პატიმრობას ითხოვდა, ხოლო ადვოკატი გიორგი კონდახიშვილი მისი დაცვის ქვეშ მყოფისთვის დაწესებული დამატებითი შეზღუდვების გაუქმებას.

განხილვის შემდეგ მოსამართლემ მიიღო გადაწყვეტილება, რომ თბილისის საქალაქო სასაამართლოს გადაწყვეტილება ძალაში ანუ უცვლელად დაეტოვა. შესაბამისად მან არც ერთი მხარის შუამდგომლობა არ დააკმაყოფილა.

სასამართლოს გადაწყვეტილებით, ნიკა მელიაზე ელექტრონული მონიტორინგი განხორციელდება და მას დამატებითი კონტროლისთვის სამაჯურს დაუმაგრებენ.

შეგახსენებთ, საქალაქო სასამართლოს მოსამართლის განჩინებით ნიკა მელიას 27 ივნისს 30 000 ლარიანი გირაო შეეფარდა. ასევე, მელიას ეკრძალება, როგორც პროკურორთან შეუთანხმებლად სახლიდან გადაადგილება, ასევე საზოგადოებრივი თავშეყრის ადგილებში საჯარო განცხადების გაკეთება და მოწმეებთან ნებისმიერი კომუნიკაცია. მელიას ბრალი საქართველოს სსკ-ის 225-ე მუხლის პირველი და მეორე ნაწილებით აქვს წარდგენილი, რაც ჯგუფური ძალადობის ხელმძღვანელობას, ასევე მასში მონაწილეობას გულისხმობს, რასაც თან ახლავს ძალადობა, სამართალდამცავი ორგანოს წარმომადგენელზე თავდასხმა და მისთვის წინააღმდეგობის გაწევას.

Patreon P მხარი დაუჭირე "ექსპრესნიუსს" →

ავტორი: ლუკა ცარციძე, ექსპრესნიუსის რეპორტიორი 2019 წლიდან