„აშშ-ს წარმომადგენლობითმა პალატამ ერთსულოვნად დაამტკიცა საქართველოს მხარდამჭერი ორპარტიული კანონპროექტი, რაც საქართველოსა და აშშ-ს  შორის თანამშრომლობის თვისობრივად კიდევ უფრო მაღალ დონეზე აყვანის მზაობის მკაფიო დასტურია“, - ამის შესახებ საქართველოს საგარეო საქმეთა მინისტრმა, დავით ზალკალიანმა დღეს გამართულ ბრიფინგზე განაცხადა.

საგარეო საქმეთა მინისტრმა, დეტალურად ისაუბრა იმაზე, თუ რას ითვალისწინებს ორპარტიული კანონპროექტი.

„ამერიკის შეერთებული შტატების წარმომადგენლობითმა პალატამ ერთსულოვნად დაამტკიცა საქართველოს მხარდამჭერი აქტი, რაც უაღრესად მნიშვნელოვანია და თვისობრივად ახალ ეტაპზე გადაჰყავს საქართველო-აშშ-ს შორის სტრატეგიული პარტნიორობა. ორპარტიული კანონპროექტი ითვალისწინებს ძალიან მნიშვნელოვან გზავნილებს. პირველ რიგში, ის გმობს რუსეთის ფედერაციის მხრიდან საქართველოს ტერიტორიების აფხაზეთის და ცხინვალის რეგიონის ოკუპაციასა და ფაქტობრივ ანექსიას. ძალიან მნიშვნელოვანია, რომ ის ასევე გმობს ოკუპირებულ ტერიტორიებზე ადამიანის უფლებების უხეში დარღვევის ფაქტებს და არის განსაკუთრებული ხაზგასმა საქართველოს პარლამენტის მიერ მიღებულ რეზოლუციაზე ე.წ. ოთხოზორია-ტატუნაშვილის სიაზე. აღნიშნული კანონპროექტი ითვალისწინებს გარკვეულ სანქციებს - კერძოდ, კონგრესი ამერიკის შეერთებულ შტატებში შესვლის აკრძალვისა და ფინანსური აქტივების დაყადაღების გზით სანქციების დაწესებას მოითხოვს ყველა იმ პირისადმი, ვინც უშუალო მონაწილეობით ან დახმარების გაწევის გზით პასუხისმგებელია რუსეთის მიერ ოკუპირებულ აფხაზეთის და ცხინვალს ტერიტორიაზე ადამიანის უფლებების უხეშ დარღვევაზე. კონგრესი ასევე ავალებს აშშ-ს აღმასრულებელ ხელისუფლებას კანონის მიღებიდან 60 დღის განმავლობაში ზემოთხსენებულ დანაშაულებრივ ქმედებებში ბრალდებულ პირებზე წარმოადგინოს დეტალური ანგარიში“, - განაცხადა ზალკალიანმა.

ამასთან,ზალკალიანის თქმით, აშშ-ის კონგრესი მხარს უჭერს საქართველოს ევროპულ და ევროატლანტიკურ ინტეგრაციას.

გარდა ამისა, კონგრესი შეერთებული შტატების სახელმწიფო მდივანს მოუწოდებს, რომ წარმოადგინოს ხუთი წლის ანგარიში, თუ რა მხარდაჭერა იყო საქართველოსთვის გამოხატული თავდაცვისა და უსაფრთხოების სფეროში.

„კონგრესი შეერთებული შტატების სახელმწიფო მდივანს, ასევე, მოუწოდებს, რომ წარმოადგინოს ხუთი წლის ანგარიში თუ რა მხარდაჭერა იყო საქართველოსთვის გამოხატული თავდაცვისა და უსაფრთხოების სფეროში; ასევე წარმოადგინოს ხუთწლიანი სტრატეგია ამ მიმართულებით ამერიკის შეერთებული შტატების შემდგომ ქმედებებთან დაკავშირებით, რაც კიდევ უფრო გააძლიერებს საქართველოს უსაფრთხოებას და თავდაცვისუნარიანობას. კანონპროექტში, ასევე, საუბარია აღმასრულებელი ხელისუფლების მხრიდან ქმედითი ნაბიჯების გადადგმაზე დეზინფორმაციის და პროპაგანდასთან ბრძოლაში საქართველოს მხარდაჭერაზე.

განსაკუთრებით მინდა ხაზი გავუსვა ერთ მნიშვნელოვან მოვლენას - კანონპროექტში არის მოწოდება ამერიკის შეერთებული შტატების სავაჭრო წარმომადგენლის მიმართ, რომ მან გადადგას ქმედითი ნაბიჯები საქართველოსთან თავისუფალი ვაჭრობის შეთანხმებაზე მოლაპარაკების დაწყების მიმართულებით. ეს უაღრესად მნიშვნელოვანი ელემენტია ამ კანონპროექტში. აღსანიშნავია, რომ ამერიკა საქართველოს მრავალწლიანი ურთიერთობის ისტორიაში კონგრესმა პირველად დაამტკიცა ცალკემდგომი დოკუმენტი“, - აღნიშნა დავით ზალკალიანმა.

ავტორი: ,

სოციალური ქსელები

ბერეკაშვილი: ეს იყო არა ფასების დაკლების, არამედ ფასების შემსწავლელი კომისია

დაბომბვის შემდეგ პირველად ისტორიაში, სერბეთმა ნატოსთან ერთად პირველი სამხედრო წვრთნა დაიწყო

საფრანგეთში, ნოროვირუსის აფეთქების გამო, კარანტინში მოათავსეს 1700 ადამიანის გადამყვანი საკრუიზო გემი

დუმამ ოკუპირებულ ცხინვალთან მოკავშირეობის გაღრმავების კანონპროექტი მიიღო