CBS - აშშ სირიის ჩრდილო-დასავლეთ ნაწილში დახმარების პროგრამას წყვეტს

2018-05-19 17:23:15, 3102 ნახვა

მსოფლიო

ამერიკის შეერთებული შტატები სირიის ჩრდილო-დასავლეთ ნაწილში დახმარების პროგრამებს წყვეტს.

როგორც CBS News-ი იუწყება, აშშ-ს სურს მკაფიოდ დაანახოს ყველას, რომ ამერიკელი სამხედროები „ისლამური სახელმწიფოს“ დამარცხების შემდეგ, სირიას სწრაფად დატოვებენ.

საუბარია იდლიბის პროვინციაზე, სადაც იძულებით გადაადგილებული ადამიანები ცხოვრობენ. პროვინციას ამჟამად მეამბოხეები აკონტროლებენ.

რაც შეეხება დაფინანსების შეწყვეტას, მედიის ინფორმაციით, საუბარია დაახლოებით 200 მილიონ აშშ დოლარზე.

შეერთებული შტატების დახმარების პროგრამა ვითარების სტაბილიზაციისკენ იყო მიმართული. ოფიციალური ვაშინგტონი ადგილობრივ მთავრობას ტერორისტებთან ბრძოლაში ეხმარებოდა. ტარდებოდა რიგი საგანმანათლებლო პროექტებიც.

სირიის ამავე ნაწილში მდებარეობს აფრინის პროვინცია, სადაც 2018 წლიდან თურქეთმა სირიელი ქურთი მებრძოლების წინააღმდეგ მიმართული სამხედრო ოპერაცია წამოიწყო. ასევე, ზოგიერთ რაიონს ტერორისტული ჯგუფები აკონტროლებენ. დანარჩენი ტერიტორია კი, სირიელი სამხედროების დაქვემდებარებაშია.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები