"ნაციონალური მოძრაობის" წევრებმა პროტესტის ნიშნად, საკომიტეტო სხდომა დატოვეს

2015-05-07 14:40:59, 336 ნახვა

პოლიტიკა

საპარლამენტო უმცირესობის წევრებმა საკომიტეტო სხდომა დატოვეს, სადაც მთავრობის წევრებს უსმენენ.
უმცირესობის წევრების პროტესტის მიზეზი მინისტრებისთვის დასასმელი კითხვებისთვის განკუთვნილი დროის სიმცირე გახდა. იურიდიულ საკითხთა კომიტეტის თავმჯდომარე ვახტანგ ხმალაძემ მათ მთავრობის წევრებისთვის დასასმელი კითხვებისთვის 20 წუთი შესთავაზა, პასუხებისთვის კი, 40 წუთი გამოყო.
"ოპოზიციას მიეცეს 2 წუთი, უმრავლეოსობას 1 წუთი კითხვების დასასმელად.ვითვალისწინებთ იმას, რომ ოპოზიციას მეტი შეკითხვები აქვს მთავრობასთან, ვიდრე უმრავლესობას.40 წუთი დავუთმოთ პასუხებს",-განაცხადა ვახტანგ ხმალაძემ.
უმცირესობის წევრის გიორგი ვაშაძის განცხადებით, 2 წუთში ისინი მინისტრებისთვის კითხვის დასმას ვერ შეძლებდნენ.
"აზრი არ აქვს ამ ვითარებაში კითხვების დასმას.როგორ შეიძლება 1 წუთში ვკითხოთ იუსტიციის მინისტრს ყველაფერი? ან ნებისმიერ სხვას?",-განაცხადა გიორგი ვაშაძემ.
თავდაცვისა და უშიშროების კომიტეტის თავმჯდომარე ირაკლი სესიაშვილმა კი განაცხადა, რომ თუ უმცირესობას კითხვების დასმა არ სურდა და არ აინტერესებდა შინაარსი, უმრავლესობის უფლებებს მაინც დაიცავდნენ.
"დაიცავით თქვენი უფლებები, მეტი მაინც არაფერი გაღელვებთ",-უპასუხა გიორგი ვაშაძემ.
ამის შემდეგ, საპარლამენტო უმცირესობამ პროტესტის ნიშნად პარლამენტის იურიდიულ საკითხთა, ადამიანის უფლებათა დაცვისა და სამოქალაქო ინტეგრაციის, თავდაცვისა და უშიშროებისა და საპროცედურო საკითხთა და წესების კომიტეტების გაერთიანებული სხდომა დატოვა.