ბიზნესის დამოკიდებულება შემოსავლების სამსახურის საქმიანობის მიმართ დადებითია

2016-07-21 15:26:53, 1254 ნახვა

ეკონომიკა

სასტუმრო „თბილისი რუმსში“ ამერიკის შეერთებული შტატების საერთაშორისო განვითარების სააგენტოს პროექტი “მმართველობა განვითარებისათვის “ (USAID G4G)-სა და შემოსავლების სამსახურის წარმომადგენელთა მონაწილეობით, CRRC საქართველოს მიერ, USAID G4G-ს საგრანტო პროგრამის ფარგლებში მომზადებული კვლევის, “ბიზნესის დამოკიდებულება საგადასახადო სისტემისადმი საქართველოში“ პრეზენტაცია გაიმართა.

როგორც შემოსავლების სამსახურიდან "ექსპრენიუსს" განუცხადეს, პრეზენტაციას ბიზნესწრეების, სამთავრობო სტრუქტურებისა და მედიის წარმომადგენლები ესწრებოდნენ.

„ჩვენთვის, შემოსავლების სამსახურისთვის, მნიშვნელოვანია ვიცოდეთ, თუ რა დამოკიდებულება აქვს საგადასახადო ადმინისტრირების და ზოგადად შემოსავლების სამსახურის საქმიანობის მიმართ ჩვენს სტრატეგიულ პარტნიორს, ბიზნესს, აღნიშნული კვლევის მიზანი კი, სწორედ ბიზნესის დამოკიდებულების განსაზღვრა, ანალიზი და შეფასება იყო“ - სასტუმრო თბილისი რუმსში გამართულ პრეზენტაციაზე განაცხადა ფინანსთა სამინისტროს შემოსავლების სამსახურის უფროსმა, გიორგი თაბუაშვილმა.

“ბიზნესის დამოკიდებულება საგადასახადო სისტემისადმი საქართველოში“ კვლევის შედეგების მიხედვით, გამოკითხული კომპანიების დამოკიდებულება შემოსავლების სამსახურის საქმიანობისა და მისი სერვისებისადმი, უმეტესწილად დადებითია. თუმცა, გამოკითხულთა დიდმა ნაწილმა გამოთქვა საგადასახადო კანონმდებლობის გაუმჯობესების სურვილი. აღსანიშნავია, რომ საგადასახადო შემოწმებებისათვის დახარჯული დრო და ჯარიმების ოდენობა უარყოფით გავლენას არ ახდენს კომპანიების მიერ სისტემის ზოგად შეფასებაზე. საკმაოდ დადებითად შეფასდა შემოსავლების სამსახურის მიერ შეთავაზებული სერვისებიც. გამოიკვეთა რიგი სერვისები, რომლებსაც ყველაზე აქტიურად მოიხმარენ საწარმოები, კერძოდ: ცხელი ხაზის (2 299 999), ელექტრონული ფოსტითა და სერვის ცენტრის მომსახურება, ასევე წინასწარი დეკლარირება დოკუმენტის გაფორმების ეკონომიკურ ზონაში მიტანით და საქონლის საბაჟო დეკლარირება მოკლე ტექსტური შეტყობინების მეშვეობით.

პრეზენტაციის შემდეგ გაიმართა დისკუსია და კითხვა-პასუხის სესია.