ხვალ, საკრებულოს შუალედური არჩევნები გაიმართება.

ცენტრალური საარჩევნო კომისიის ინფორმაციით, არჩევნები გლდანის, გარდაბნის, კასპის, წყალტუბოს, ოზურგეთის, ხობის და ზუგდიდის ადგილობრივი მაჟორიტარული ოლქების 45 საარჩევნო უბანზე გაიმართება. ამომრჩეველთა საერთო რაოდენობა 54, 314-ს შეადგენს.

შუალედურ არჩევნებთან დაკავშირებით ცენტრალური საარჩევნო კომისიის სპიკერმა ანა მიქელაძემ დღეს საინფორმაციო ბრიფინგი გამართა.

როგორც მან განაცხადა, საარჩევნო ადმინისტრაცია მზად არის არჩევნების პროფესიულ და ყველასათვის ხელმისაწვდომ გარემოში ჩასატარებლად.

“თითოეულ უბანს უკვე გადაეცა ყველა საჭირო ინვენტარი და დოკუმენტაცია: საარჩევნო ბიულეტენები, მათ შორის, ორენოვანი ბიულეტენები (5 750) აზერბაიჯანული თემისთვის, შემაჯამებელი ოქმები, ასევე გამადიდებელი ლინზები მცირემხედველი ამომრჩევლებისთვის. საკრებულოს შუალედური არჩევნების დანიშვნა ყველა ადგილობრივ საარჩევნო ოლქში მოხდა საკრებულოს მაჟორიტარი დეპუტატებისთვის უფლებამოსილების ვადამდე შეწყვეტის გამო“,-განაცხადა ანა მიქელაძემ.

ყველა საარჩევნო უბანი ამომრჩევლისთვის ხვალ დილის 08:00 სთ-დან გაიხსნება,  ხმის მიცემის პროცესი 20:00 საათზე დასრულდება, რის შემდეგაც, საარჩევნო ადმინისტრაცია ხმის დათვლის პროცედურებს დაიწყებს. ცესკო საუბნო შემაჯამებელ ოქმებს მიღებისთანავე გამოაქვეყნებს კომისიის სპეციალურ ვებ-გვერდზე: results.cec.gov.ge.

ანა მიქელაძის განცხადებით, 22 მაისის საკრებულოს შუალედური არჩევნებისთვის 5 საარჩევნო სუბიექტია რეგისტრირებული. ესენია: №1 - თავისუფალი საქართველო; №5 - ერთიანი ნაციონალური მოძრაობა; №33 - ირაკლი ალასანია-თავისუფალი დემოკრატები; №24 - სახალხო ხელისუფლება; №41 - ქართული ოცნება;  არჩევნებში ასევე ღებულობენ მონაწილეობას ორი საინიციატივო ჯგუფის კანდიდატები  გარდაბანსა და ოზურგეთში.

22 მაისს, არჩევნების დღეს დააკვირდება 19 ადგილობრივი სადამკვირვებლო ორგანიზაციის 292 დამკვირვებელი და ერთი საერთაშორისო ორგანიზაციის 6 დამკვირვებელი; შუალედურ არჩევნებს  18 მედია  ორგანიზაციის 300 წარმომადგენელი გააშუქებს.

საარჩევნო კანონმდებლობის მიხედვით, არჩევნების დღეს აგიტაცია მხოლოდ კენჭისყრის შენობაში იკრძალება. 22 მაისს აკრძალულია წინაასაარჩევნო ფასიანი და უფასო რეკლამის განთავსება ტელევიზიასა და რადიოში; ასევე, კანონით იკრძალება კენჭისყრის დღის 20:00 საათამდე არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნება.

„შეგახსენებთ, რომ ხვალ დილის 07:00 სთ-იდან ღამის 24:00 სთ-მდე იმუშავებს ცესკოს სატელეფონო-საინფორმაციო ცენტრი - 2 51 00 51; ასევე, ონლაინ ჩატი. მოქალაქეებს და დაინტერესებულ მხარეებს შეუძლიათ მოგვაწოდონ ან მიიღონ არჩევნებთან დაკავშირებული ნებისმიერი სახის ინფორმაცია. ცენტრალური საარჩევნო კომისია მთელი დღის განმავლობაში მუდმივად მოგაწოდებთ ინფორმაციას არჩევნების დღის მიმდინარეობის შესახებ”,- განაცხადა ანა მიქელაძემ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ირანმა რუსი უმდიდრესი ოლიგარქის იახტას ჰორმუზის სრუტის გავლით ნება დართო

რუსეთის არმიაში საკვების დეფიციტის ფონზე კანიბალიზმის შემთხვევები დაფიქსირდა - The Sunday Times

კობახიძე - ყველა პარამეტრით ვუსწრებთ უკრაინას და მოლდოვას

ზურაბიშვილი ქართველი მებრძოლების ჩამოსვენებაზე - საპატიო ყარაული არ არის, დიდი სირცხვილია