ამერიკის შეერთებული შტატები აპირებს რუსეთის პრეზიდენტის, ვლადიმერ პუტინის მოწვევას დიდი ოცეულის ლიდერების სამიტზე, რომელიც დეკემბერში პრეზიდენტ დონალდ ტრამპის მაიამიში, გოლფის კურორტზეა დაგეგმილი. გასამართ სამიტზე, პუტინისთვის მოწვევა ჯერ არ გაუგზავნიათ.

ამის შესახებ ინფორმაციას The Washington Post ავრცელებს.

აშშ-ის სახელმწიფო დეპარტამენტმა განცხადებაში აღნიშნა, რომ პრეზიდენტმა დონალდ ტრამპმა „ნათლად განაცხადა, რომ რუსეთი მისასალმებელია დიდი ოცეულის ყველა შეხვედრაში მონაწილეობის მისაღებად, რადგან შეერთებული შტატები ორიენტირებულია წარმატებული და პროდუქტიული სამიტის ჩატარებაზე“.

„ამ დროისთვის ოფიციალური მოწვევები არ გაუგზავნიათ, მაგრამ რუსეთი დიდი ოცეულის წევრია და მიწვეული იქნება მინისტრთა შეხვედრებსა და ლიდერების სამიტზე მონაწილეობის მისაღებად“, - განაცხადა ადმინისტრაციის მაღალჩინოსანმა, ანონიმურობის პირობით, მედიაბრიფინგზე.

ტრამპმა ხუთშაბათს, ოვალურ კაბინეტში ჟურნალისტებთან საუბრისას განაცხადა, რომ პუტინის მოწვევის შესახებ არაფერი იცოდა, მაგრამ წინააღმდეგი არ იქნებოდა.

„თუ ის მოვა, ეს ალბათ ძალიან სასარგებლო იქნება“, - თქვა პრეზიდენტმა და მოგვიანებით დასძინა, რომ „ის იმ აზრზეა, რომ ყველასთან უნდა ვისაუბროთ“. თუმცა, მან აღნიშნა, რომ ეჭვი ეპარება, რომ პუტინი დაესწრება მოწვევის შემთხვევაში.

რუსეთი 2019 წლიდან არ მონაწილეობდა G20-ის პირისპირ შეხვედრებში, თავდაპირველად კორონავირუსის პანდემიის, შემდეგ კი 2022 წელს უკრაინაში შეჭრისა და საერთაშორისო სისხლის სამართლის სასამართლოს მიერ პუტინის დაპატიმრების ორდერის გამო.

ხუთშაბათს, რუსეთის ოფიციალურმა პირებმა განაცხადეს, რომ პუტინმა მიიღო მოწვევა მაიამის სამიტზე, მაგრამ ჯერ არ იყო ნათელი, დაესწრებოდა თუ არა ის. კრემლის პრესსპიკერმა დიმიტრი პესკოვმა, ჟურნალისტებთან ტელეფონით საუბრისას, განაცხადა, რომ „ჩვენი მონაწილეობის ფორმატის შესახებ გადაწყვეტილება სამიტთან ახლოს იქნება მიღებული“.

რუსულ მედიასთან საუბრისას, საგარეო საქმეთა მინისტრის მოადგილემ, ალექსანდრე პანკინმა აღნიშნა, რომ აშშ-მ მოწვევა „უმაღლეს დონეზე“ გაავრცელა, მაგრამ იმის გათვალისწინებით, რომ ღონისძიებამდე ჯერ კიდევ რამდენიმე თვეა დარჩენილი, ჯერ არ არის ნათელი, მიიღებენ თუ არა მას.

შეგახსენებთ, რომ მარტში ტრამპმა განაცხადა, რომ პუტინთან „კარგი“ სატელეფონო საუბარი ჰქონდა, რომლის დროსაც მათ უკრაინაში ომი და ახლო აღმოსავლეთში ესკალაცია განიხილეს.

ტრამპსა და პუტინს შორის სატელეფონო საუბარი მაშინ შედგა, როდესაც ამერიკის პრეზიდენტმა გამოაცხადა თავისი გადაწყვეტილება ნავთობის სანქციების „გარკვეული ქვეყნების“ წინააღმდეგ მოხსნის შესახებ.

ავტორი: ექსპრესნიუსი,

სოციალური ქსელები

ევროკომისიამ რუსეთის მოქალაქეებისთვის ვიზების გაცემის გამკაცრების პირობა დადო

კრემლმა პუტინისა და გერმანიის ყოფილ კანცლერ შროდერის შეხვედრის შესახებ განაცხადა

პუტინის პასუხის შემდეგ, ზელენსკიმ რუსეთის მხრიდან საომარი მოქმედებების შეწყვეტის სურვილის არქონაზე მიუთითა და სანქციების გამკაცრებისკენ მოუწოდა

აზოვის ზღვაში დრონის თავდასხმის შედეგად ხუთი აზერბაიჯანელი მეზღვაური დაიღუპა