ტელეკომპანია „თრიალეთის“ განცხადებით, სატელიტური მაუწყებლობა შეწყვიტეს. ტელეკომპანია მიზეზად ხელისუფლების მხრიდან სისტემურ ფინანსურ ზეწოლას ასახელებს.

„თრიალეთის“ ინფორმაციით, შემოსავლების სამსახურმა ბოლო თვეებში რამდენჯერმე დაადო ინკასო კომპანიის ანგარიშებს, რამაც მუშაობის პარალიზება გამოიწვია.

ტელეკომპანია განცხადებაში შერჩევით სამართალზე საუბრობს და აღნიშნავს, რომ „თრიალეთის“ მიმართ გამოიყენება მკაცრი ზომები, ხოლო ხელისუფლებასთან დაახლოებული მედიის მიმართ – არა.

„დღეს შეწყდა ტელეკომპანია „თრიალეთის“ სატელიტური მაუწყებლობა – ხელისუფლების სისტემური ზეწოლის შედეგად ხელოვნურად შექმნილი კრიზისის გამო. ეს არის „თრიალეთის“ განადგურებისკენ გადადგმული კიდევ ერთი ნაბიჯი, რომელიც შურისძიებით მოქმედმა ხელისუფლებამ უკვე „წარმატებით“ განახორციელა.

ფინანსთა სამინისტროს შემოსავლების სამსახური კანონდარღვევით ახორციელებს ზეწოლას „თრიალეთზე“. უფლებამოსილების ბოროტად გამოყენებით, ბოლო ექვსი თვის განმავლობაში მათ სამჯერ დაადეს ინკასო კომპანიის ანგარიშებს, ჩამოაჭრეს თანხები, შემდეგ მოხსნეს და კვლავ აღადგინეს შეზღუდვა – არა მხოლოდ საგადასახადო აღსრულების მიზნით, არამედ დამოუკიდებელი მედიის ეკონომიკური დესტაბილიზაციისთვის.

საქართველოს კონსტიტუცია ყველასთვის უზრუნველყოფს კანონის წინაშე თანასწორობას და კრძალავს დისკრიმინაციულ ან შერჩევით მოპყრობას. შემოსავლების სამსახური ვალდებულია მსგავს სამართლებრივ მდგომარეობაში მყოფ პირებს ერთნაირად მოეპყროს.

ხელისუფლებასთან დაახლოებულ მედიაორგანიზაციებს აქვთ ათეულობით მილიონი ლარის საგადასახადო დავალიანება, თუმცა მათ მიმართ არ გამოიყენება მკაცრი ზომები. მაშინ როცა „თრიალეთის“ მიმართ – რომლის დავალიანებაც მნიშვნელოვნად ნაკლებია – გამოყენებულია ყველაზე მძიმე აღსრულების ფორმა, რამაც გამოიწვია მისი საქმიანობის პარალიზება.

სახელმწიფომ უარი თქვა „თრიალეთისთვის“ კანონით გათვალისწინებულ საგადასახადო შეთანხმების მექანიზმზე, მაშინ როცა ამავე ხელისუფლებამ წლების განმავლობაში ასეთი შეთანხმება გააფორმა ათიათასზე მეტ ორგანიზაციასთან, ხოლო ჩამოწერილი თანხა 5 მილიარდ ლარს აჭარბებს.

ასეთი განსხვავებული მიდგომები წარმოადგენს შერჩევით სამართალს და ეწინააღმდეგება კონსტიტუციით გარანტირებულ თანასწორობის პრინციპს. შემოსავლების სამსახურმა დაარღვია პროპორციულობისა და კეთილსინდისიერი ადმინისტრირების პრინციპები. ეს არ არის საგადასახადო აღსრულება – ეს არის პოლიტიკური შურისძიება.

„თრიალეთი“ ყოველდღიურად აცნობებს საქართველოსა და საერთაშორისო უფლებადამცველ ორგანიზაციებს, მთავრობებსა და ინსტიტუტებს, ხელისუფლების მიერ უკანონო ზეწოლისა და
თავისუფალი მედიის ჩახშობის მცდელობის შესახებ.

ამავე დროს, კანონდარღვევების შესახებ ინფორმირებულია საქართველოს პარლამენტი, პრემიერ-მინისტრი ირაკლი კობახიძე, მთელი მთავრობა, პარტია „ქართული ოცნება“ და მისი თავმჯდომარე ბიძინა ივანიშვილი – თუმცა რეაგირება არ არსებობს!
არავინ იკვლევს, დაირღვა თუ არა კანონი. არავინ ინტერესდება, შეილახა თუ არა ადამიანის უფლებები. ყველა ჩუმად ელოდება, როდის ჩაახშობენ დამოუკიდებელ მედიას! ეს არის სამართლიანი ქვეყანა? ეს არის თქვენი დემოკრატია?

ჩვენ არ გავჩუმდებით! დადგება დრო, როდესაც უკანონო დავალებების შემსრულებელი ჩინოვნიკები კანონის წინაშე პასუხს აგებენ. სოლიდარობა „თრიალეთს” – თავისუფლება მედიას!“, – ნათქვამია ტელეკომპანიის განცხადებაში.

ავტორი: ექსპრესნიუსი,

სოციალური ქსელები

ელექტროენერგიის მიწოდება ნაწილობრივ აღუდგა დიდუბის, ვაკის, მთაწმინდისა და კრწანისის რაიონებს, ასევე ქუთაისის, ჭიათურის, საჩხერის, ონისა და ამბროლაურის ნაწილს

სახელმწიფო ელექტროსისტემის ინფორმაციით, ქვეყნის მასშტაბით ელექტროენერგია ავარიულად გაითიშა და მიწოდება ეტაპობრივად აღდგება

EU-ის სანქციების 21-ე პაკეტში ყულევის ქარხანა და ქართული კრიპტოპლატფორმებიც მოხვდა

ფედოროვი ვიცე-პრემიერობაზე უარს ამბობს და თავდაცვის სამინისტროში დაბრუნებას ითხოვს