ინფრასტრუქტურის სამინისტროს მუნიციპალური განვითარების ფონდმა თბილისში ახალი, უეფას IV კატეგორიის სტადიონის პროექტირებისა და მშენებლობისთვის ტენდერი გამოაცხადა, რომლის სავარაუდო ღირებულებაც 876 მლნ ლარია.

ტენდერი დღეს გამოცხადდა. წინადადებების მიღება 25 სექტემბერს დაიწყება, 29 სექტემბერს დასრულდება.

ინფრასტრუქტურის სამინისტროს გავრცელებული ინფორმაციით, ახალი სტადიონი აეროპორტთან, ლუგარის კვლევითი ცენტრის მიმდებარედ აშენდება. უნდა აღინიშნოს, რომ ახალი სტადიონის მშენებლობა თავდაპირველად ვაზიანში იგეგმებოდა.

70 000 გულშემატკივარზე გათვლილი სტადიონი იქნება თანამედროვე მრავალფუნქციური არენა, სადაც გაიმართება ფეხბურთისა და რაგბის მატჩები, კონცერტები და სხვა ადგილობრივი თუ საერთაშორისო ღონისძიებები. სტადიონი შეძლებს ჩემპიონთა ლიგის და სხვა მაღალი დონის მატჩების მასპინძლობას.

სტადიონის ტერიტორიაზე, ასევე, გათვალისწინებულია საზოგადოებრივი ცენტრის ფუნქციონირება. იგეგმება საკონფერენციო, საგამოფენო, დასასვენებელი ზონების, მუზეუმისა და სავაჭრო სივრცის მოწყობა.

ინფრასტრუქტურის სამინისტროში აცხადებენ, რომ ქალაქის სხვადასხვა ადგილიდან სტადიონთან სწრაფად მისასვლელად დაგეგმილია ახალი სატრანსპორტო კვანძების პროექტირება და მშენებლობა, რაც უზრუნველყოფს მგზავრების კომფორტულ გადაადგილებას.

"ახალი მულტიფუნქციური სტადიონის კონცეფცია UEFA ექსპერტებთან ერთად მუშავდება. საერთაშორისო სპეციალისტები აქტიურად მონაწილეობენ პროექტის ყველა ეტაპზე — მათ შორის, სტადიონის სატენდერო ტექნიკური დავალების მომზადებაში. ექსპერტები პროექტში ჩართულნი იქნებიან სტადიონის კონცეფციის შემუშავებიდან მის საბოლოო დასრულებამდე.

დოკუმენტაციაში პროექტის მიზნობრიობაა განმარტებული: "საქართველოს ახალი ეროვნული სტადიონის პროექტის მიზანია მსოფლიო დონის, მრავალფუნქციური სტადიონის მშენებლობა, რომელიც სიმბოლურად ასახავს საქართველოს დამოკიდებულებას სპორტისადმი და ქვეყნის სტუმართმოყვარეობას. ეს უნდა იყოს ქვეყნისთვის სანიმუშო ადგილი, რომელიც შეძლებს უმასპინძლოს მსოფლიო კლასის კლუბებს, საერთაშორისო შეჯიბრებებსა და ფინალებს, ისევე როგორც მნიშვნელოვან ღონისძიებებს. სტადიონი განკუთვნილი იქნება პროფესიონალური ფეხბურთის, რაგბის, კონცერტების, სხვა ღონისძიებების ჩატარებისა და დასვენებისთვის. დავალებით გათვალისწინებულია 70,000 მაყურებელზე გათვლილი, საერთაშორისო სტანდარტების შესაბამისი სტადიონის საპროექტო დოკუმენტაციის შემუშავება, რომელიც მოიცავს არა მხოლოდ ძირითადი სტადიონის არქიტექტურულ და საინჟინრო გადაწყვეტებს, არამედ მასთან დაკავშირებული თანამდევი ინფრასტრუქტურის - საშხაპეების, გასახდელების, პრესის და VIP სივრცეების, სადგომების, განათების, უსაფრთხოების სისტემებისა და სხვა აუცილებელი კომპონენტების სრულყოფილ გეგმას.

დამკვეთის მოთხოვნის ტექნიკური დავალების მიხედვით, თბილისის ეროვნული სტადიონის საპროექტო ტერიტორია მდებარეობს თბილისში აეროპორტის მიმდებარე ტერიტორიაზე, ლუგარის კვლევით ცენტრის, კახეთის გზატკეცილისა და ევროპის ქუჩის გადაკვეთას შორის.

„სტადიონის მშენებლობისთვის ტერიტორია მრავალდონიანი თვისობრივი შეფასების შედეგად შეირჩა, რაც წინასწარ განსაზღვრულ კრიტერიუმებს ეფუძნებოდა“, - აღნიშნულია დოკუმენტში.

რიჩარდ ლუგარის სახელობის საზოგადოებრივი ჯანდაცვის კვლევითი ცენტრი — საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის ბაზაზე არსებული კვლევითი ცენტრი (ლაბორატორია), რომელიც 2011 წელს გაიხსნა და სრულ ექსპლუატაციაში 2013 წლის აგვისტოში შევიდა. ლუგარის ცენტრი ქვეყნის ლაბორატორიული ქსელის უმაღლესი დონის დაწესებულებაა, რომელიც წარმოადგენს საქართველოს საზოგადოებრივი ჯანდაცვის სისტემის რეფერალურ ლაბორატორიას. ლუგარის ცენტრი ერთ-ერთი საუკეთესო ბაზაა რეგიონში ბიოსამედიცინო სფეროში და ბიოუსაფრთხოებაში სამეცნიერო კვლევებისათვის და სტუდენტების, მაგისტრების და დოქტორების მოსამზადებლად. კვლევითი ცენტრი მდებარეობს თბილისში, კახეთის გზატკეცილზე.

ლუგარის კვლევით ცენტრში განლაგებულია თანამედროვე დონეზე აღჭურვილი ბიოუსაფრთხოების მე–2 და მე–3 დონის ლაბორატორიები, რომელთა მიზანია ადამიანისა და ცხოველთა საშიშ დაავადებათა გამომწვევი პათოგენების დროული აღმოჩენა და იდენტიფიკაცია „ერთიანი ჯანმრთელობის“ პრინციპით. კვლევით ცენტრში ასევე განლაგებულია პათოგენების ეროვნული საცავი, სადაც უსაფრთხოდ დაცულია ადამიანისა და ცხოველის დაავადებების გამომწვევი განსაკუთრებით საშიში პათოგენები.

კვლევით ცენტრში ფუნქციონირებს ჯანმრთელობის მსოფლიო ორგანიზაციის (გაეროს ქვე-ორგანიზაცია) მიერ აკრედიტებული 3 ვირუსოლოგიური ლაბორატორია.

ავტორი: ექსპრესნიუსი,

სოციალური ქსელები

ხაბეიშვილი - ივანიშვილის ხელისუფლება სახელმწიფო ქონებას და ხალხის ფულს საკუთარი ფუფუნებისთვის ფლანგავს

საქართველოს ბანკის მხარდაჭერით, ლბ კაპიტალი თბილისში სასაწყობე პროექტს ახორციელებს

პაატა მანჯგალაძე ჩერგოლეიშვილის განცხადებაზე:მეტი დრო აღარ დავკარგოთ და სჯობს ისევ პროტესტზე და წინააღმდეგობაზე გადავერთოთ

სამხედრო მეთაური ორბანს - სანქციები და უნგრეთში შესვლაზე შეზღუდვები ტრ**ში გაიკეთეთ, ბატონო "ძვლებზე მოცეკვავევ