ჩქაროსნული ავტომაგისტრალის გაუმჯობესების შესახებ სამთავრობო შეთანხმება გაფორმდა

2016-03-08 10:57:13, 719 ნახვა

ეკონომიკა

აღმოსავლეთ-დასავლეთის ჩქაროსნული ავტომაგისტრალის გაუმჯობესების პროექტისთვის დამატებითი დაფინანსების გამოყოფის მიზნით, გაფორმდა სამთავრობო შეთანხმება (ნოტების გაცვლის გზით) საქართველოსა და იაპონიას შორის, რომელსაც ხელი საქართველოს საგარეო საქმეთა მინისტრმა, მიხეილ ჯანელიძემ და იაპონიის ელჩმა საქართველოში ტოშიო კაიტანიმ მოაწერეს.

ფინანსთა სამინისტროს ინფორმაციით, საფინანსო ხელშეკრულება იაპონიის საერთაშორისო თანამშრომლობის სააგენტოსა (JICA) და საქართველოს შორის გააფორმეს საქართველოს ფინანსთა მინისტრმა, ნოდარ ხადურმა და იაპონიის საერთაშორისო თანამშრომლობის სააგენტოს უზბეკეთის ოფისის ხელმძღვანელმა კაცუტოში ფუშიმიმ.

"დოკუმენტები ითვალისწინებს იაპონიის მთავრობის (JICA-ს მეშვეობით) დაფინანსებით მიმდინარე „აღმოსავლეთ-დასავლეთის ჩქაროსნული ავტომაგისტრალის გაუმჯობესების პროექტისათვის" (ზესტაფონი-ქუთაისი-სამტრედიის მონაკვეთი) დამატებითი (4.41მილიარდი იაპონური იენის ოდენობის, დღეის მდგომარეობით, დაახლოებით 38.5 მილიონი აშშ დოლარი) დაფინანსების გამოყოფას.

პროექტი ამჟამად განხორციელების ეტაპზეა. ქუთაისის ახალი შემოვლითი გზის სამშენებლო სამუშაოები დასრულებულია, მიმდინარეობს სამშენებლო სამუშაოები ქუთაისის ახალი შემოვლითი-სამტრედიის გზაზე და ზესტაფონი-ქუთაისის ახალი შემოვლითი გზის მონაკვეთზე.

პროექტის დასაფინანსებლად შესაბამისი ხელშეკრულებები გაფორმებული იქნა 2009 წელს, რომლის ფარგლებშიც საქართველოსათვის გამოყოფილი იქნა 17.722 მილიარდი იაპონური იენი გრძელვადიანი შეღავათიანი სესხის სახით.

საქართველოსთვის მნიშვნელოვანია იაპონიის საერთაშორისო თანამშრომლობის სააგენტოს მხარდაჭერა ისეთი სტრატეგიული სატრანსპორტო ინფრასტრუქტურის დაფინანსების მიმართულებით, როგორიცაა აღმოსავლეთ-დასავლეთის ჩქაროსნული ავტომაგისტრალი, რომელმაც ხელი უნდა შეუწყოს საქართველოს გადაქცევას რეგიონის სავაჭრო, სატრანზიტო, ეკონომიკურ და ლოგისტიკურ ცენტრად.

აღნიშნული ინფრასტრუქტურული პროექტი მნიშვნელოვანია ქვეყნის ეკონომიკის ზრდისა და სტაბილური განვითარებისთვის. ის ხელს შეუწყობს ასევე ქვეყნის რეგიონების სწრაფ განვითარებასა, რაც გულისხმობს ახალი სამუშაო ადგილების შექმნას და ცხოვრების დონის გაუმჯობესებას",-ნათქვამია უწყების განცხადებაში.