ვოლსკი: ერთსქესიანთა ქორწინების საკითხის „რესპუბლიკელებთან“ დაკავშირება, რბილად რომ ვთქვათ, არაობიექტურია

2016-03-02 13:23:54, 526 ნახვა

პოლიტიკა

კოალიციის წევრებს შორის დაპირისპირება პიროვნული დამოკიდებულების ფარგლებს გასცდა და პოლიტიკურ თემებს გადაწვდა, - ამის შესახებ საპარლამენტო უმრავლესობის ლიდერის მოადგილემ, გია ვოლსკიმ გადაცემა 2030-ში განაცხადა.
“როგორმე უნდა გამოვიდეთ ამ ჯადოსნური წრიდან. საგარეო კურსთან დაკავშირებით, ექსკლუზივი არც „რესპუბლიკელებს“ ეკუთვნით და არც არავის. საქართველოს ევროატლანტიკურ სტრუქტურებში ინტეგრაციასთან დაკავშირებით, კოალიციას მყარად ჩამოყალიბებული ხედვა აქვს“, - აღნიშნა ვოლსკიმ.
რაც შეეხება ერთი და იმავე სქესის ადამიანთა ქორწინების საკითხს, გია ვოლსკიმ აღნიშნა, რომ „ამ საკითხის „რესპუბლიკელებთან“ დაკავშირება არაობიექტურია“.
„ჩვენ საუბარი დავიწყეთ კონსტიტუციურ ცვლილებაზე, რაც ქორწინების ცნებას განმარტავს. „რესპუბლიკელებმა“ პირველებმა ჩამოაყალიბეს ისეთი ფორმულირება, რაც 36-ე მუხლში უფრო მეტ სინათლეს შეიტანდა. კოალიციის წევრებს შორის ამ საკითხის მიმართ განსხვავებული პათოსი არ არსებობს“, - განაცხადა გია ვოლსკიმ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან