2024-12-04 22:23:42, 455 ნახვა

---

ვაშაძე - უნდა მივიდეთ იმ ნიშნულამდე, რომ არა მხოლოდ გავაგრძელოთ პროტესტი, არამედ საქართველოში საყოველთაო გაფიცვა მოხდეს

ჩვენ უნდა მივიდეთ იმ ნიშნულამდე, რომ არა მხოლოდ გავაგრძელოთ პროტესტი, არამედ საყოველთაო დაუმორჩილებლობა, გაფიცვა მოხდეს მთელ საქართველოში,- ამის შესახებ „ერთიანობა - ნაციონალური მოძრაობის“ ერთ-ერთმა ლიდერმა, გიორგი ვაშაძემ ოთხი ბარიერგადალახული ოპოზიციური პარტიის შეხვედრის დასრულების შემდეგ განაცხადა.

როგორც ვაშაძემ ჟურნალისტებს უთხრა, ოპოზიცია „თვითმარქვია რეჟიმს ერთიანობას უპირისპირებს“.

„ძალადობის ახალი ეტაპი, რასაც ჩვენ ველოდით თვითმარქვია რეჟიმისგან, ამას ვუპირისპირებთ ერთიანობას. დავიცავთ ყველა ახალგაზრდას ყველა მექანიზმით. დარწმუნებული ვარ, საბოლოო გამარჯვებამდე მივალთ, როცა ყველა მათგანი იქნება თავისუფალი.

რაც მთავარია, ჩვენ უნდა მივიდეთ იმ ნიშნულამდე, რომ არა მხოლოდ გავაგრძელოთ პროტესტი, არამედ საყოველთაო დაუმორჩილებლობა, გაფიცვა მოხდეს მთელ საქართველოში. ეს არის ჩვენი დიახ, ამოცანა, რომელიც ყველამ ერთად, კოორდინირებულად, ერთსულოვნად უნდა შევასრულოთ.

რაც არ უნდა მოხდეს, ჩვენ მზად ვართ ყველაფრისთვის. აქ შეკრებილი ყველა ადამიანი ერთსულოვნად ამბობს, რომ ყველა რომ დაგვიჭირონ, მზად უნდა ვიყოთ, რომ ბრძოლა მივიყვანოთ ბოლომდე და მერწმუნეთ, ორ რამეზე დგას ეს თვითმარქვია რეჟიმი - ერთი ეს არის სამართალდამცავები, რომელთა იდენტიფიცირებასაც ჩვენ გავაკეთებთ და მეორე, რომელსაც აქვს თავისი სახე - ეს არის ტელეკომპანია „იმედი“ და POSTV. რაზეც დგას ეს ძალადობრივი რეჟიმი, არის ორი რამ - ეს არის კანონგარეშე მოქმედი სამართალდამცავი უწყებები - შსს, სუს-ი, სასამართლოს ჩათვლით, ტელეკომპანია „იმედი“, POSTV როგორც მთავარი ძალაყინი. ხანდახან ხელი წაუცდება ხოლმე „რუსთავი 2“-ს და საზოგადოებრივ მაუწყებელს. ჩვენ ვითხოვთ ობიექტურას და რომ იყოთ ხალხის მხარეს... ვაგრძელებთ ბრძოლას“,- განაცხადა ვაშაძემ.

შეგახსენებთ, დღეს, 4 დეკემბერს „კოალიცია ცვლილებისთვის“, ენმ-ის ახალგაზრდული ორგანიზაციისა და „დროას“ ოფისებში პოლიცია შევიდა.

დღეს იყო დაკავებების სერიაც, მათ შორის პოლიციამ „კოალიცია ცვლილებისთვის“ ერთ-ერთი ლიდერი ნიკა გვარამია და ენმ-ის ახალგაზრდული ორგანიზაციის 5 წევრი დააკავა.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი