2024-11-17 17:56:35, 473 ნახვა

---

ბოკუჩავა - დღეს გავფრინდი ბრიუსელში, EU-ის წევრი ქვეყნების საგარეო მინისტრებთან შესახვედრად, რომლებიც საქართველოზე ხვალ იმსჯელებენ

დღეს გავფრინდი ბრიუსელში, ევროკავშირის წევრი ქვეყნების საგარეო მინისტრებთან შესახვედრად, რომლებიც საქართველოზე ხვალ იმსჯელებენ,- ამის შესახებ "ერთიანობა ნაციონალური მოძრაობის" თავმჯდომარემ, თინა ბოკუჩავამ განაცხადა.

როგორც ბოკუჩავამ აღნიშნა, "მიტაცებული არჩევნების საერთაშორისო ლეგიტიმაციის არაღიარების პოლიტიკის შენარჩუნება დღეს ჩვენი ბრძოლის უმნიშვნელოვანესი პრიორიტეტია".

"დღეს გავფრინდი ბრიუსელში, ევროკავშირის წევრი ქვეყნების საგარეო მინისტრებთან შესახვედრად, რომლებიც საქართველოზე ხვალ იმსჯელებენ. მიტაცებული არჩევნების საერთაშორისო ლეგიტიმაციის არაღიარების პოლიტიკის შენარჩუნება დღეს ჩვენი ბრძოლის უმნიშვნელოვანესი პრიორიტეტია. 

საერთაშორისო იზოლაციაში მოქცეულ რეჟიმს მოუწევს იმ ერთადერთ დათმობაზე წამოსვლა, რომელსაც ჩვენ მივიღებთ - ესაა ხელახალი არჩევნები, რომელსაც ჩაატარებს პროფესიონალი, კეთილსინდისიერი საარჩევნო ადმინისტრაცია და არა თავლაფდასხმული არჩევნების ქურდი - გიორგი კალანდარიშვილი. 

აქვე კიდევ ერთხელ მადლობა მინდა ვუთხრა ენმ-ს ცესკოს წევრს დავით კირთაძეს, რომელმაც გუშინ გულწრფელი პროტესტით მთელი ქვეყნის სათქმელი გამოხატა გიორგი კალანდარიშვილის მიმართ. 

ვიბრძვით ცესკოში, ვიბრძვით საერთაშორისო ასპარეზზე, ვიბრძვით სასამართლოში და ვიბრძვით ქუჩაში. ენმ-მ 73-ვე საარჩევნო ოლქის შემაჯამებელი ოქმი გაასაჩივრა, რომელიც ჯერ ცესკოში, შემდეგ სასამართლოში გასაჩივრდა. პირველი ინსტანციის მოსამართლემ, ივერი აბაშიძემ, მონური მორჩილებით დააკანონა გაყალბებული არჩევნები, სააპელაციო სასამართლოს კოლეგიამ კი სხდომის ჩანიშვნაც ვერ გაბედა და ენმ-ს მოპოვებული 1260 გვერდიანი მტკიცებულებები მაკულატურად აქცია. 

ბრძოლის ყველა ასპარეზთან ერთად, გადამწყვეტია ჩვენი ერთიანი საზოგადოებრივი პროტესტი არჩევნების უფლების დასაბრუნებლად. ამ ბრძოლაში არ არსებობს პარტიული ხაზები და დღის წესრიგი, ეს არის ბრძოლა ქვეყნის გადარჩენისთვის, სადაც უნდა ვიყოთ ერთიანი, როგორც არასდროს. 

დღეს, სამოქალაქო საზოგადოების მიერ დაანონსებულ აქციას ენმ შეუერთდება მსვლელობით. განსაკუთრებით ამაყი ვარ, რომ ენმ-ს ამ და ყველა სხვა საპროტესტო აქციაზე, რუსთაველზე თუ საქართველოს სხვა ქალაქებსა და ქუჩებში, წარმოადგენენ ჩვენი გულანთებული ახალგაზრდები. ჩვენი ბრძოლაც მათ ეკუთვნის, მათ და ჩვენს შვილებს, რათა თაობების ბრძოლა თავისუფლებისთვის ევროკავშირში გაწევრიანებით დაგვირგვინდეს, რისი ისტორიული შანსიც ჩვენ დღეს გვეძლევა. 

წინასაარჩევნო კამპანიისგან განსხვავებით, დღეს პარტიული დღის წესრიგის ჭიდილი ვერ გახდება ივანიშვილის რუსულ რეჟიმზე გამარჯვების საფუძველი. მიმაჩნია, რომ ამ მართლაც ეროვნულ და ისტორიულ ბრძოლაში, სასიცოცხლოდ მნიშვნელოვანია პოლიტიკურ-საზოგადოებრივი კონსოლიდაცია. ერთად ჩვენ შევძლებთ! ძალა ერთობაშია! ძალა ევროპაშია!",- განაცხადა თინა ბოკუჩავამ

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი