ავარია უჯარმის ციხესთან - დაღუპულია მცირეწლოვანი ბავშვი

2016-02-20 22:08:31, 694 ნახვა

საზოგადოება

ავარია უჯარმის ციხესთან დღეს საღამოს მოხდა. ერთმანეთს საწინააღმდეგო მიმართულებით მოძრავი ორი მიკროავტობუსი შეეჯახა, რის შედეგადაც არიან გარდაცვლილები და დაშავებულები.

მომხდარი ავარიის შედეგად რამდენიმე ადამიანი გარდაიცვალა, მათ შორის მცირეწლოვანი ბავშვია. ამ დროისთვის საავადმყოფოში ავარიის შედეგად დაშავებული ორი მოქალაქეა მიყვანილი, მათი მდგომარეობა უკიდურესად მძიმეა. ერთ-ერთს კი ამ წუთებში გადაუდებელი ქირურგიული ოპერაცია უტარდება. დაშავებულებს კიდურებისა და შინაგანი ორგანოების დაზიანებები აღენიშნებათ.

საგარეჯოს რაიონული საავადმყოფოს მენეჯერის განცხადებით, ავარიაში მოყოლილი ბავშვი საავადმყოფოში უკვე გარდაცვლილი მიიყვანეს.

თბილისიდან და თელავიდან მომავალი სამარშუტო ტაქსების შეჯახების მიზეზი გადაჭარბებული სიჩქარე გახდა.

ადგილზე სამაშველო და სასწრაფო დახმარების ბრიგადები მუშაობენ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან