ღვინის ეროვნული სააგენტოს მხარდაჭერით და საქართველოს სომელიეთა ასოციაციის ორგანიზებით, რიგით მესამე კონკურსი „საქართველოს საუკეთესო სომელიე" გაიმართა. ფინალურ ეტაპზე, საკონკურსო დავალებების შედეგების შეჯამების შედეგად,  2022 წლის საქართველოს საუკეთესო სომელიე კობა აბრამიშვილი გახდა.

ღვინის ეროვნული სააგენტოს ცნობით, კონკურსის ჟიურის წევრმა, ღვინის ეროვნული სააგენტოს თავმჯდომარემ, ლევან მეხუზლამ სომელიეს პროფესიის მნიშვნელობაზე ისაუბრა და აღნიშნა, რომ ღვინის მოხმარების კულტურის ამაღლებასა და პოპულარიზაციაში ის ერთ-ერთ განსაკუთრებულ როლს თამაშობს.

„სომელიეს პროფესია უკვე დამკვიდრდა და აქტიურად ვითარდება საქართველოში. მინდა მოვუწოდო ყველას, ვინც ღვინის ინდუსტრიაშია ჩართული, დააფასონ ეს პროფესია, რადგან სწორედ სომელიე წარუდგენს მომხმარებელს ღვინოს და გადასცემს ინფორმაციას ღვინის კულტურასა და ისტორიაზე, ამ პროფესიის ადამიანია უშუალო შუამავალი ღვინის მწარმოებელსა და მომხმარებელს შორის.  მნიშვნელოვანია, რომ საქართველოში ღვინის სწორი მოხმარების კულტურა დაინერგოს, რაშიც სომელიეებს დიდი როლი აკისრიათ", - აღნიშნა ლევან მეხუზლამ.

კონკურსში მონაწილეობდა 10 სომელიე, რომელთაგან სამი ფინალურ ეტაპზე გადავიდა. რამდენიმე საკონკურსო დავალების შედეგების შეჯამების შედეგად, ჟიურიმ კონკურსის გამარჯვებული სომელიე კობა აბრამიშვილი გამოავლინა.

კონკურსის ჟიურის საქართველოს სომელიეთა ასოციაციის პრეზიდენტი შალვა ხეცურიანი თავმჯდომარეობდა.

ჟიურის შემადგენლობაში შედიოდნენ ღვინის ეროვნული სააგენტოს თავმჯდომარე ლევან მეხუზლა, ღვინის ეროვნული  სააგენტოს მარკეტინგისა და საზოგადოებასთან ურთიერთობის დეპარტამენტის უფროსი თამარ მეტრეველი, ასევე დარგის სხვა ექსპერტები.

კონკურსის საპატიო სტუმარი იყო უკრაინის სომელიეთა ასოციაციის პრეზიდენტი, ივან ბაჩურინი.
ღონისძიების ფარგლებში, „საქართველოს საპატიო სომელიეს" წოდება რეჟისორებს  ნანა ჯორჯაძეს და ოთარ იოსელიანს, სცენარისტ თამარ ბართაიას, საქართველოს ეროვნული მუზეუმის დირექტორს, მეცნიერ დავით ლორთქიფანიძე და მოჭადრაკე ნონა გაფრინდაშვილს მიენიჭათ.

საქართველოს მეღვინეობის დარგში შეტანილი განსაკუთრებული წვლილისთვის საქართველოს სომელიეთა ასოციაციის მიერ დაწესებული „ქართული ღვინის ორდენი" შპს ღვინის ლაბორატორიის დირექტორს, ირმა ჭანტურიას გარდაცვალების შემდეგ მიენიჭა.

ავტორი: NS (სტატია დაფინანსებულია),

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება