2022-11-16 21:19:15, 707 ნახვა

---

ტალიაშვილი - დღეს ევროკავშირმა ევროსაბჭოს მინისტრთა კომიტეტის სხდომაზე საქართველოს მხარდამჭერი უპრეცედენტოდ ძლიერი განცხადება გააკეთა

ევროპის საბჭოში საქართველოს ელჩის, თამარ ტალიაშვილის განცხადებით, დღეს ევროკავშირმა ევროსაბჭოს მინისტრთა კომიტეტის სხდომაზე საქართველოს მხარდამჭერი უპრეცედენტოდ ძლიერი განცხადება გააკეთა.

„ევროკავშირის განცხადება უმნიშვნელოვანესი ნაბიჯია საქართველოს ოკუპირებულ ტერიტორიებთან მიმართებაში რუსეთის როლის ადეკვატურად და სწორად შესაფასებლად. ეს კიდევ ერთხელ უსვამს ხაზს საქართველოს უსაფრთხოების მნიშვნელობას მთლიანად ევროპის უსაფრთხოებისთვის და ევროკავშირის წევრი ქვეყნების ურყევ მხარდაჭერას საქართველოსადმი. 

აღსანიშნავია, რომ ევროკავშირის განცხადებაში ძლიერი აქცენტია საქართველოს აფხაზეთისა და ცხინვალის რეგიონებთან მიმართებაში რუსეთის მიერ განხორციელებულ საოკუპაციო მოქმედებებზე, სწორედ „ოკუპაციის“ სახელდებით. ევროკავშირი მოუწოდებს რუსეთის ფედერაციას შეასრულოს სასამართლო გადაწყვეტილება, მათ შორის საქართველოს რეგიონების ოკუპაციის პერიოდში ჩადენილ დანაშაულებებთან მიმართებაში. 

ევროპის საბჭოს გენერალური მდივნის კონსოლიდირებული ანგარიში - „კონფლიქტი საქართველოში“ აღწერს 2022 წლის აპრილიდან ოქტომბრის ჩათვლით რუსეთის მიერ ოკუპირებულ საქართველოს აფხაზეთისა და ცხინვალის რეგიონებში და საოკუპაციო ხაზის გასწვრივ უსაფრთხოების, ადამიანის უფლებებისა და ჰუმანიტარული კუთხით არსებულ მძიმე მდგომარეობას.

ანგარიშის თაობაზე, ევროკავშირის 27 წევრი ქვეყნის სახელით, განცხადება გააკეთა ევროპის საბჭოში ევროკავშირის დელეგაციამ. 

ევროკავშირი მიესალმა ევროპის საბჭოს ანგარიშს და ხაზი გაუსვა პოლიტიკურ დღის წესრიგში საკითხის შენარჩუნების მნიშვნელობას; გამოხატა სინანული იმის გამო, რომ არ სრულდება ევროპის საბჭოს მინისტრთა კომიტეტის გადაწყვეტილება საქართველოში კონფლიქტის თაობაზე. ევროკავშირმა მკაცრად დაგმო რუსეთის ფედერაციის ქმედებები საქართველოს აფხაზეთისა და ცხინვალის რეგიონებში;

ევროკავშირის განცხადებაში მნიშვნელოვანი ადგილი დაეთმო ევროპის ადამიანის უფლებათა სასამართლოს 2021 წლის 21 იანვრის გადაწყვეტილებას საქართველო რუსეთის წინააღმდეგ (II), რომელიც ნათლად საუბრობს საქართველოს რეგიონებზე რუსეთის ეფექტურ კონტროლზე.

ევროკავშირი შეშფოთებას გამოხატავს საქართველოს აფხაზეთისა და ცხინვალის რეგიონებში ადამიანის უფლებათა მდგომარეობის გამო და სინანულს გამოხატავს, რომ პროგრესი არ იქნა მიღწეული დევნილების ნებაყოფლობითი და უსაფრთხო დაბრუნების კუთხით. 

ევროკავშირი მიესალმება საქართველოს ხელისუფლების ერთგულებას მშვიდობის პოლიტიკისადმი. 
ევროკავშირი მხარს უჭერს საერთაშორისო მექანიზმების ჩართულობას და გამოხატავს სინანულს, რომ ევროპის საბჭოს სხვადასხვა დელეგაციებსა და მონიტორინგის ჯგუფებს არ აქვთ დაშვება საქართველოს აფხაზეთისა და ცხინვალის რეგიონებზე და მოუწოდებს ეფექტური კონტროლის მქონე სახელმწიფოს გააადვილოს მათი დაშვება. 

ევროკავშირის საბჭო კიდევ ერთხელ გამოხატავს ურყევ მხარდაჭერას საქართველოს დამოუკიდებლობის, სუვერენიტეტისა და ტერიტორიული მთლიანობისადმი“, - წერს ტალიაშვილი Facebook-ზე.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი