2020-01-29 18:12:55, 1580 ნახვა

---

ვაშაძე ევროსაბჭოში პრეზიდენტის გამოსვლაზე: საქართველოს კლოუნი ბევრჯერ ჰყავდა, მაგრამ ამისთანა იშვიათია

„საქართველოს კლოუნი ბევრჯერ ჰყავდა, მაგრამ ამისთანა იშვიათია“, - ასე აფასებს ფრაქცია „ნაციონალური მოძრაობის“ ლიდერი გრიგოლ ვაშაძე საქართველოს პრეზიდენტის, სალომე ზურაბიშვილის სიტყვით გამოსვლას ევროსაბჭოს საპარლამენტო ასამბლეაზე.

მისი თქმით, ზურაბიშვილის განცხადებას საქართველოს მოქალაქეებისგან განრისხებული რეაქცია მოყვება.

„ეს მმართველი გუნდი, ყველა წარმომადგენლიანად, რეალობას აბსოლუტურად აცდენილია. რატომ უნდათ ისევ საქართველოში მეორე გავრილოვის ღამე, სრულიად გაუგებარია. აქ ხომ პოლიტიკურ პარტიებზე ლაპარაკი არ არის, ეს გამოიწვევს 100-პროცენტიან უზარმაზარ, განრისხებულ რეაქციას საქართველს მოქალაქეებისგან, განსაკუთრებით იმ ადამიანებისგან, ვინც რუსული არაერთი აგრესიის გამო დაკარგეს თავისი წინაპრების საფლავზე მისვლის უფლება და თავის საცხოვრებელ სახლებში ყოფნის უფლება. საერთოდ არ შემიძლია შევაფასო. საქართველოს ბევრჯერ ჰყავდა კლოუნი, მაგრამ ამისთანა ძალიან იშვიათია“, - განაცხადა გრიგოლ ვაშაძემ.

შეგახსენებთ, რომ სალომე ზურაბიშვილი გუშინ, ევროპის საბჭოს საპარლამენტო ასამბლეაზე სიტყვით გამოვიდა. როგორც მან სიტყვით გამოსვლისას განაცხადა, საქართველო მზადაა უმასპინძლოს რუსეთის დელეგაციას ევროსაბჭოს საპარლამენტო ასამბლეაზე, რომელიც მაისში თბილისში გაიმართება. მისივე თქმით, მიუხედავად იმისა, რომ დელეგაციის წევრებს დარღვეული აქვთ საქართველოს კანონი ოკუპირებული ტერიტორიების შესახებ, ქვეყანა მათ მაინც მიიღებს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი