საზღვაო მოძრაობის გაიოლების შესახებ ეროვნული სემინარი იმართება

2019-09-24 12:52:18, 914 ნახვა

საზოგადოება

ბათუმში, 2019 წლის 24-27 სექტემბერს საერთაშორისო საზღვაო ორგანიზაციისა (IMO) და საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოს ერთობლივი ორგანიზებით საზღვაო მოძრაობის გაიოლების შესახებ ეროვნული სემინარი (NATIONAL SEMINAR ON FACILITATION OF INTERNATIONAL MARITIME TRAFFIC) იმართება.

საზღვაო ტრანსპორტის სააგენტოს დირექტორის მოადგილის, ივანე აბაშიძის განცხადებით, სემინარი დაიგეგმა საქართველოს მოთხოვნით IMO-ს ტექნიკური დახმარების ფარგლებში მთავრობის ინიციატივის - საქართველოს საზღვაო ნავსადგურებში ერთი ფანჯრის პრინციპის დანერგვის ხელშესაწყობად და მასში მონაწილეობას მიიღებენ საქართველოს ნავსადგურებში გემების მიმოსვლის პროცესებში უშუალოდ ჩართული სახელმწიფო უწყებები და კერძო სექტორის წარმომადგენლები.

- „სემინარი ტარდება საერთაშორისო საზღვაო ორგანიზაციის მხარდაჭერით, რაც ძალიან მაღალი დონის საერთაშორისო ექსპერტების მოწვევაში გამოიხატება. ვფიქრობთ, რომ მათგან მიღებული ცოდნა და გაზიარებული გამოცდილება მნიშვნელოვანად დაგვეხმარება ჩვენი საპორტო პროცედურების დახვეწასა და თანამედროვე მოთხოვნებთან ჰარმონიზაციაში“ - განაცხადა ივანე აბაშიძემ.

ვორქშოფზე საერთაშორისო ექსპერტები დეტალურად განიხილავენ საქართველოს სანავსადგურე სექტორში ერთი ფანჯრის პრინციპის დანერგვის პერსპექტივებს და მოსალოდნელი შედეგებს, ნავსადგურებში გემებისა და ტვირთების მიღების/გაფორმების თანამედროვე ელქტრონული ასპექტების შესახებ კონცეფციას, საქართველოში არსებული გემებისა და ტვირთების მიღების/გაფორმების სისტემას და არსებული გამოწვევებს.

როგორც IMO-ს გემების მოძრაობის გამარტივების სამმართველოს უფროსმა ჯულიანა ბრილგარსიამ აღნიშნა, საქართველო საერთაშორისო საზღვაო ორგანიზაციის აქტიური წევრია და თავისი წვლილი შეაქვს ორგანიზაციის მუშაობაში. IMO მიესალმება და მხარს უჭერს საქართველოს საზღვაო სექტორის განვითარების ინიციატივებს, მათ შორის ქართულ ნავსადგურებში ერთი ფანჯრის პრინციპის დანერგვას.

(NS)

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,