ორთაჭალაჰესის ფარების გახსნა მდინარე მტკვრის კალაპოტში წყლის დონის ცვლილებას გამოიწვევს

2015-07-04 17:02:53, 602 ნახვა

საზოგადოება

ორთაჭალაჰესის ფარების გახსნა მდინარე მტკვრის კალაპოტში წყლის დონის ცვლილებას გამოიწვევს, - ამის შესახებ განცხადებას გარემოსა და ბუნებრივი რესურსების დაცვის სამინისტრო ავრცელებს.

უწყების ინფორმაციით, 13 ივნისს მომხდარი წყალდიდობის შედეგების აღმოფხვრის მიზნით გაწმენდითი სამუშაოების ჩასატარებლად კვლავ საჭიროა ორთაჭალაჰესის ზედა ბიეფში წყლის მინიმალურ დონემდე დაწევა.

„აღნიშნულიდან გამომდინარე 4 ივლისს 21:00 საათიდან იგეგმება ორთაჭალაჰესის ფარების გახსნა. გარემოსა და ბუნებრივი რესურსების დაცვის სამინისტრო აფრთხილებს საზოგადოებას, რომ აღნიშნულ ქმედებას მოჰყვება წყლის დონის ცვლილება მდინარე მტკვრის კალაპოტში. კერძოდ, ორთაჭალაჰესის ფარების გახსნა გამოიწვევს მდინარის წყლის დონის მატებას დასაშვებ ნორმებში ორთაჭალის ჰესიდან აზერბაიჯანის საზღვრამდე. ჰესის დაცლის პროცესს, კონტროლის განხორციელების მიზნით, დაესწრებიან გარემოსადაცვითი ზედამხედველობის დეპარტამენტის და გარემოს ეროვნული სააგენტოს სპეციალისტები“, - ნათქვამია უწყების განცხადებაში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან