მოქალაქეები, რუსი დეპუტატების საქართველოში ვიზიტს აპროტესტებენ [ვიდეო]

2019-06-20 13:01:55, 904 ნახვა

საზოგადოება

პარლამენტთან, მოქალაქეები თბილისში მართლმადიდებლური საპარლამენტთაშორისო ასამბლეის ჩატარებასა და პარლამენტში რუსი დეპუტატების ყოფნას აპროტესტებენ.

დემონსტრანტებს ბანერები აქვთ მოტანილი და აპირებენ რუს დეპუტატებს სირცხვილის მორიგი კორიდორი მოუწყონ.

"ვაპროტესტებთ საქართველოს დამოკიდებულებას რუსეთისადმი, რუსი დეპუტატების ყოფნას პარლამენტში ზოგადად. ეს არის ჩვენთვის შეურაცხმყოფელი და ყოვლად მიუღებელი. არ შეიძლება ასეთი კომფრომისტული დამოკიდებულება პუტინის ფაშისტურ რეჟიმთან", - განაცხადა აქციის ერთ-ერთმა მონაწილემ დავით ნასყიდაშვილმა.

ადგილზე სამართალდამცველები არიან მობილიზებული. აქციას ორგანიზება "რუსეთი ოკუპონტიამ" გაუწია.

ცნობისთვის, თბილისში მართლმადიდებლური საპარლამენტთაშორისო ასამბლეა მიმდინარეობს, რომელსაც ანტიქარტული რიტორიკის მქონე რუსი დეპუტატი სერგეი გავრილოვიც ესწრება. ასამბლეა გუშინ სახელმწიფო ცერემონიების სასახლეში გაიხსნა. აღნიშნულმა ფაქტმა ქართულ საზოგადოებაში პროტესტი გამოიწვია. მოქალაქეებმა ყოფილ რეზიდენციასთან აქცია გამართეს და რუსი დეპუტატები სირცხვილის კორიდორში გაატარეს. დღეს ასამბლეა პარლამენტში იმართება. აღსანიშნავია, რომ მას ხსენებული გავრილოვი უძღვებოდა. დეპუტატმა პარლამენტის თავმჯდომარის ირაკლი კობახიძის სავარძელიც დაიკავა. ამან "ევროპული საქართველოს" და "ნაციონალური მოძრაობის" გაღიზიანება გამოიწვია და მათ გავრილოვის მიერ სხდომის ჩატარება გააპროტესტეს.