ეკა ბესელია მოსამართლეების არჩევის საკითხზე კანონპროექტის წარდგენისთვის მზადაა

2019-02-27 12:40:34, 1354 ნახვა

პოლიტიკა

ეკა ბესელია მოსამართლეების არჩევის საკითხზე კანონპროექტის წარდგენისთვის მზადაა - ექსპრესვიდეო

პარლამენტის წევრები - ეკა ბესელია, გედევან ფოფხაძე და ლევან გოგიჩაიშვილი საერთაშორისო ორგანიზაციების, პროფესიული გაერთიანებებისა და არასამთავრობო ორგანიზაციების წამომადგენლებთან, სასამართლო რეფორმის პროექტთან დაკავშირებით შეხვედრას მართავენ.

როგორც ეკა ბესელიამ შეხვედრის დაწყებამდე ჟურნალისტებს განუცხადა, ის წარადგენს ინიციატივას, თუ როგორ უნდა მოხდეს პარლამენტის მიერ იუსტიციის უმაღლეს საბჭოში მოსამართლეების შერჩევა.

"დღეს ახალ ინიციატივას წარვადგენ. ეს ინიციატივა ეხება, თუ როგორ უნდა მოხდეს უზენაეს სასამართლოს მოსამართლეების არჩევა და პროცედურა პარლამენტის მიერ. ეს ახალი ინიციატივა დაეფუძნა იმ კონსულტაციებს, რომელსაც ვმართავდი იანვრის თვეში, როგორც ჩვენს ევროპელ და ამერიკელ პარტნიორებთან და ექსპერტებთან, ასევე ადგილობრივ პროფესიულ წრეებთან, იურისტებთან და მეცნიერებთან, რომელთაც იციან სასამართლო რეფორმის ყველაზე მნიშვნელოვანი გამოწვევები რა არის. ამ პროექტის დღეს წარდგენით მთავარი მიზანი რაც მინდა, ჩვენ ის ადამიანები, ვინც ხელს მოვაწერთ ამ ინიციატივას და შემდეგ კვირას დავარეგისტრირებთ, გვინდა რომ ყველას პოზიცია იყოს თანხვედრაში ამ ინიციატივით, რომ ამ პროექტს მხარს უჭერდეს, ყველა ის პარტნიორი, ყველა ის ორგანიზაცია, ყველა ის წარმომადგენელი, რომელიც ჩართულია ძალიან დიდი ხანია მართლმსაჯულების რეფორმის პროცესში. რა არის ეს ინიციატივა? პირველი - ჩვენი პროექტი კონკურსის გამოცხადების მაღალ სტანდარტს ითვალისწინებს. ყველას შეეძლება მონაწილეობა, ვინც კანონით დადგენილ მოთხოვნებს დააკმაყოფილებს. ეს არის ასაკი, პროფესიული განათლება, გამოცდილება. ამის შემდეგ მთავარი პროცესი გადმოდის პარლამენტში. ჩვენი ინიციატივის მთავარი არსია, რომ იუსტიციის საბჭოს, რომელსაც არ აქვს დღეს ნდობა, მან არ შექმნას ხელოვნური ბარიერები და არ წარმოადგინოს მხოლოდ იმ კანდიდატების სია, რამდენი ვაკანსია არსებობს და მხოლოდ ის ადამიანები, რომელიც მას სურს. ჩვენი ვერსიით დაზღვეული იქნება ეს რისკი იმით, რომ ყველა მსურველი რომელიც ამ მინიმალურ კანონის მოთხოვნას აკმაყოფილებს, პარლამენტში გადმოინაცვლებს და კომიტეტში შექმნილი სამუშაო ჯგუფი და შემდეგ უკვე კომიტეტი დეტალურად შეისწავლის მათ ბიოგრაფიას და იქნება ღია პროცესი. ეს არის ძირითადი არსი და ეს არის ძირითადი განსხვავება იმ ვერსიის, რასაც ახლა ირაკლი კობახიძე იუსტიციის საბჭოსთან ერთად ამზადებს. ეს ის ვერსიაა, რომელსაც თუ ის დააინცირებს, ეს არ იქნება, ის ვერსია რომელიც ეფუძნება იმ რეკომენდაციებს, რომელიც ჩვენ მივიღეთ ყველა ჩვენი მხარდამჭერი პარტნიორის თუ მონაწილის მხრიდან და იმ ვერსიით სახიფათო იქნება, ვნახოთ ჯერ არ დარეგისტრირებულა, მაგრამ რაც ჩანს, სახიფათოა ის რომ მაინც დომინანტად რჩება იუსტიციის საბჭო. დღეს ვნახოთ როგორი იქნება მოსაზრებები, მე მზად ვარ ყველა შენიშვნა და ყველა შემოთავაზება გავუზიარო იმისთვის რომ ყველანი ვიქნებით ერთ პოზიციაზე", - აღნიშნა ეკა ბესელიამ.