სეპარატისტების მხარდამჭერი ემირ კუსტურიცა თბილისში ჩამოდის

2017-09-27 12:02:18, 2263 ნახვა

საზოგადოება

სერბი კინორეჟისორი ემირ კუსტურიცა, რომელსაც საქართველოს ოკუპირებული ტერიტორიების შესახებ კანონი არაერთხელ აქვს დარღვეული, 8 დეკემბერს თბილისს ეწვევა, - ამის შესახებ „სპუტნიკი“ იუწყება.

მედია საშუალების ინფორმაციით, კუსტურიცა თავის ფოლკ-როკ ჯგუფთან The No Smoking Orchestra-სთან ერთად ჩამოვა. რეჟისორი აღნიშნულ ჯგუფში 1986 წელს გაწევრიანდა.

სანამ ჯგუფი თბილისში ჩამოვა, ისინი კონცერტებს, რუსეთში, ყაზახეთში, საფრაგეთში, ბელგიაში და ჩილეში გამართავენ.

ჯგუფი The No Smoking Orchestra-ს და ემილლ კუსტურიცას კონცერტი, თბილისის სპორტის სასახლეში გაიმართება.

აღსანიშნვია, რომ ცნობილი რეჟისორი ოკუპირებულ ცხინვალს 2009 წელს სტუმროდა. კერძოდ რეჟისორი, ე.წ. სამხრეთ ოსეთს 2009 წლის 9 ოქტომბერს ეწვია. როგორც მაშინ რეჟისორმა განმარტა, ის 2008 წლის აგვისტოს ომზე ფილმის გადაღებას აპირებდა და საჭირო მასალების შესაგროვებლად ჩავიდა.

Interfax-ი წერს, რომ ვიზიტის დროს რეჟისორმა საქართველო-ოსეთის კონფლიქტის დროს გარდაცვლილთა მემორიალი გვირგვინით შეამკო და სეპარატისტულ ხელისუფლებას აღიარებაში მხარდაჭერა გამოუცხადა.

ამასთან, კუსტურიცა მიმდინარე წლის 27 ივლისს, ანექსირებულ ყირიმშიც იმყოფებოდა. მედიისთვის გამართულ პრესკონფერენციაზე მან ღიად განაცხადა, რომ ყირიმი რუსეთის ნაწილია. „გააგრძელეთ იმის მტკიცება, რომ თქვენ რუსეთი ხართ. არ გჭირდებათ იმ ადამიანების მოსაზრებები და შეფასებები, ვინც უისკონსინის შტატში ცხოვრობს“, - განაცხადა კუსტურიცამ.

ცნობისთვის, „ოკუპირებული ტერიტორიების შესახებ“ კანონი უცხო ქვეყნის მოქალაქეებისათვის ოკუპირებულ ტერიტორიებზე შესვლას უშვებს: აფხაზეთის ავტონომიური რესპუბლიკის ტერიტორიებზე – ზუგდიდის მუნიციპალიტეტის მიმართულებიდან; ცხინვალის რეგიონში - გორის მუნიციპალიტეტის მიმართულებიდან.

ყველა სხვა მიმართულებიდან ოკუპირებულ ტერიტორიებზე შესვლა უცხო ქვეყნის მოქალაქეებისათვის და მოქალაქეობის არმქონე პირებისათვის აკრძალულია და საქართველოს სისხლის სამართლის კოდექსით ისჯება.