საქართველოსა და EBRD-ის 25-წლიანი თანამშრომლობა, ევროპის რეკონსტრუქციისა და განვითარების ბანკის მხარდაჭერით ქვეყანაში მიმდინარე პროექტები და საქართველოს მთავრობის რეფორმების ოთხპუნქტიანი გეგმა იყო პრემიერ-მინისტრ გიორგი კვირიკაშვილისა და EBRD-ის პრეზიდენტ სუმა ჩაკრაბარტის შეხვედრის მთავარი თემები. EBRD-ის პრეზიდენტს, რომელიც საქართველოში უკვე მესამედ იმყოფება, პრემიერმა დღეს მთავრობის ადმინისტრაციაში უმასპინძლა.

მთავრობის მეთაურმა ევროპის რეკონსტრუქციისა და განვითარების ბანკს მადლობა გადაუხადა მნიშვნელოვანი მხარდაჭერისთვის, რომლის მეშვეობით ქვეყანაში 200-ზე მეტი პროექტი და დაახლოებით 3 მილიარდი ევროსოდენობის ინვესტიცია განხორციელდა.

მთავრობის ადმინისტრაციის პრესსამსახურის ინფორმაციით, შეხვედრისას, საუბარი შეეხო EBRD-ის სტრატეგიას საქართველოსთან დაკავშირებით და აღინიშნა, რომ ის ორიენტირებულია მთავრობის ოთხპუნქტიანი რეფორმების გეგმის მხარდაჭერაზე, რომელიც სწრაფი ეკონომიკური ზრდის უზრუნველყოფას, ქვეყნის სივრცით მოწყობას, განათლების სისტემისა და მმართველობის რეფორმას გულისხმობს. ყურადღება გამახვილდა საქართველოს მიღწევებზე ინსტიტუციური და სტრუქტურული რეფორმების განხორციელების მიმართულებით, ასევე - საერთაშორისო რეიტინგებში ქვეყნის მოწინავე პოზიციებზე.

საქართველოს პრემიერ-მინისტრმა ისაუბრა საპენსიო და კაპიტალის ბაზრის რეფორმის შესახებ, რომელიც გეგმის მიხედვით მიმდინარეობს და აღნიშნა, რომ საპენსიო რეფორმა 2018 წლის მესამე კვარტლიდან ამოქმედდება. ამ ეტაპზე მზადდება შესაბამისი საკანონმდებლო ცვლილებები და საჭირო ინსტიტუციური და ტექნიკური ინფრასტრუქტურა.

გიორგი კვირიკაშვილმა მნიშვნელოვან გადაწყვეტილებად შეაფასა ევროპის რეკონსტრუქციისა და განვითარების ბანკის მიერ საერთაშორისო ბაზარზე ლარის ფასიანი ქაღალდების გამოშვება, რაც ხელს შეუწყობს ეკონომიკის ზრდას, საქართველოში ფასიანი ქაღალდების ბაზრის განვითარებას და წაახალისებს ინვესტიციებს.

მხარეებმა ასევე ყურადღება დაუთმეს EBRD-ის მხარდაჭერით შექმნილი პლატფორმის - ინვესტორთა საბჭოს საქმიანობას, რომელიც კერძო სექტორის აქტიური ჩართულობით, მათთვის მნიშვნელოვან საკითხებზე მსჯელობას ისახავს მიზნად. საბჭოს მორიგ სხდომაში, რომელიც პრემიერ-მინისტრ გიორგი კვირიკაშვილის ხელმძღვანელობით დღეს გაიმართება, EBRD-ის პრეზიდენტი მიიღებს მონაწილეობას.

ავტორი: ,

სოციალური ქსელები

ამერიკელი პოლიტიკოსები გმობენ ტრამპთან სადილზე სროლას

ბათუმში ძალადობის და ნარკოდანაშაულის ბრალდებით უცხო ქვეყნის მოქალაქე დააკავეს

ჩერნობილის 40 წელი - კატასტროფა, რომლის დამალვაც სცადეს

უკრაინული დრონები თავს დაესხნენ ობიექტებს რუსეთის ფედერაციის იაროსლავისა და ვოლოგდას რეგიონებში