აჭარაში გიდების გადამზადება სრულდება

2017-06-20 15:23:45, 796 ნახვა

რეგიონი

აჭარაში გიდების გადამზადება დასასრულს უახლოვდება.

როგორც „ექსპრესნიუსს“ აჭარის ტურიზმისა და კურორტების დეპარტამენტიდან აცნობეს, ამჟამად, პრაქტიკული ტრენინგები მთიანი აჭარის ტურისტული მარშრუტების გიდებს უტარდებათ.

დღეს ისინი, ხულოში არსებულ ტურისტულ მარშრუტზე იმყოფებიან, სადაც სხალთა-ხიხანის და ხულო-გოდერძი-მწვანე ტბის მარშრუტს გადიან.

მათივე ინფორმაციით, რამდენიმე დღის წინ კი მთიანი აჭარის ტურისტული მარშრუტის გიდებმა შუახევში ჩირუხის სათავგადასავლო ტური გაიარეს.

მოინახულეს მარშრუტზე არსებული ტურისტული ადგილები - გულისა და ჩირუხის ტბები, ოლადაურის მუზეუმი, ოქროპილაურისა და დარჩიძეების ციხეები. ასევე გაეცნენ საოჯახო-სასტუმრო სახლებსა და მათ სერვისებს.

პრაქტიკული და თეორიული ტრენინგები დაასრულეს ქედისა და მაჭახელას ტურისტული მარშრუტების მიმართულებით გადამზადების მსურველმა გიდებმა.

ისინი ტურისტული პროდუქტების განვითარების სააგენტოში ტრენინგისას მიღებული თეორიული და პრაქტიკული ცოდნის შეფასებას ელოდებიან.

ივნისის ბოლოსთვის, პრაქტიკული ტრენინგს დაცული ტერიტორიებისა და მთიანი აჭარის ტურისტული მარშრუტების გიდებიც დაასრულებს, რის შემდეგაც მათი ცოდნაც შეფასდება.

ტრენინგის დასასრულს მონაწილეებს სერტიფიკატები გადაეცემათ. მაღალი შეფასებების მქონე გიდებს კი სააგენტო პოპულარიზაციას გაუწევს.

(NS)