აჭარის უმაღლეს საბჭოში კვლავ დაპირისპირებაა

2015-04-16 17:12:11, 308 ნახვა

პოლიტიკა

აჭარის უმაღლეს საბჭოში დღევანდელი სხდომა კვლავ ხმაურით დაიწყო. "ქართულ ოცნებასა" და ოპოზიციას შორის ისევ დაპირისპირებაა. სადავო საკითხია-ვიცე სპიკერის პოსტზე ჯემელ ფუტკარაძის ყოფნა და საკანონმდებლო მუშაობა.
1 თვის წინ უმაღლეს საბჭოს სხდომაზე კენჭისყრა გაიმართა. ჯემალ ფუტკარაძის ვიცე სპიკერობას მხარი 8 დეპუტატმა დაუჭირა. აჭარის უმაღლესი საბჭოს თავმჯდომარემ კი, შედეგები უკანონოდ სცნო. "ქართული ოცნება" ჯემალ ფუტკარაძეს ვიცე-სპიკერად არ აღიარებს და მას მოუწოდებს, ჯანდაცვის კომისიის თავმჯდომარის ფუნქცია შეასრულოს.
"რატომ არ ასრულებს ჯემალ ფუტკარაძე, ჯანდაცვის კომისიის თავმჯდომარე, თავის უფლება მოვალეობებს და რაც მთავარია, თითქმის თვენახევარია უამრავი გაჭირვებული ადამიანების წერილებია თავმოყრილი ჯანდაცვის კომისიაში და ეს ადამიანი რომ "არჩეულ ჩინეთის იმპერატორად" თვლის თავს, არ ასრულებს თავის მოვალეობას. ძალინ ვთხოვ მიხედოს ამ ადამიანმა თავის საქმიანობას, თუარადა მოვიქცეთ კანონის შესაბამისად",-განაცხადა დავით ბაციკაძემ.
თავად ჯემალ ფუტკარაძემ ცენტრალურ ხელისუფლებას მოუწოდა, აჭარის უმაღლეს საბჭოში განვითარებულ მოვლენებს ყურადღება მიაქციოს.
"მინდა ვისარგებლო დღევანდელი ამ ტრიბუნით და მივმართო ცენტრალურ ხელისუფლებას, ძალიან დიდი ყუარდღების ქვეშ უნდა იყოს აჭარის უმაღლესი საბჭო. ამაზე უნდა დაინტერესდეს ქვეყნის პრეზიდენტი და ერთხელ და სამუდამოდ ჩვენ უმაღლეს საბჭოში უნდა მივაღწიოთ, რომ ან ვაგრძელებთ ერთად საქმიანობას, ან თუ არ შეგვიძლია და ვერ ვაგრძელებთ საქმიანობას, უმაღლესი საბჭო ასეთი მდგომაროებით ვერ გააგრძელებს თავის ფუნქციონირებას",-განაცხადა ჯემალ ფუტკარაძემ.
დღესვე ცნობილი გახდა, რომ "ქართულ ოცნებაში" რჩება დეპუტატი სვეტლანა კუდბა. შეგახსენებთ, სვეტლანა კუდბას ხმა გადამწყვეტი აღმოჩნდა იმისათვის, რომ "ქართული ოცნების" ვიცე-სპიკერი დავით ბაციკაძე პოსტიდან გადაეყენებინათ.