სამ თვეში სასწრაფო სამედიცინო დახმარების ცენტრში 183 461 გამოძახება დაფიქსირდა, საიდანაც 16 247 შემთხვევაში პაციენტის ჰოსპიტალიზაცია გახდა საჭირო.

სასწრაფო დახმარების ცენტრიდან გამოთხოვილი სტატისტიკის თანახმად, პაციენტებს ხშირ შემთხვევაში გულ-სისხლძარღვთა დაავადება აღენიშნებოდათ.

კერძოდ, მიმდინარე წლის იანვარში, 63 209 გამოძახებიდან, გულ-სისხლძარღვთა დაავადების ჩივილით 26 567 გამოძახება დაფიქსირდა; თებერვალში - 50 590 გამოძახებიდან 22 077; მარტში კი, 69 662 გამოძახებიდან 25 335. საერთო ჯამში, სამ თვეში გულ-სისხლძარღვთა დაავადების ნიშნებით სასწრაფოს 73 979-ჯერ მიმართეს.

აღსანიშნავია, რომ მარტში გულ-სისხლძარღვთა დაავადებების შემთხვევები გაზრდილია, რადგან ეს პერიოდი ამინდის არამდგრადობითა და მკვეთრი მერყეობით გამოირჩევა. ჰაერის ტემპერატურა, ატმოსფერული წნევა, ტენიანობა, ქარის სიჩქარე დღეში რამდენჯერმე შეიძლება შეიცვალოს. ასეთი მერყეობა ჯანმრთელ ადამიანსაც კი საგრძნობ დისკომფორტს უქმნის. წლის ეს პერიოდი კარდიოლოგიური პაციენტებისთვის განსაკუთრებით შემაწუხებელია. ამინდისა და ბუნებრივი ფაქტორების მკვეთრ მერყეობას თავისი მიზეზი აქვს – ზამთარი გაზაფხულით იცვლება. ადამიანის ორგანიზმშიც ზამთრისთვის დამახასიათებელი ნივთიერებათა ცვლის პროცესი გაზაფხულისთვის ტიპურ რეჟიმზე „გადაირთვება", რაც ორგანიზმის ყველა სისტემის ფუნქციონირებაზე ისახება.

აღსანიშნავია მაგნიტური ქარიშხლებიც, რომლებიც, უპირველეს ყოვლისა, სისხლის მიმოქცევასა და გულ-სისხლძარღვთა სისტემის მდგომარეობაზე მოქმედებს. ზოგიერთი მკვლევარი ამ გარემოებას მიიჩნევს იმის მიზეზად, რომ გულსისხლძარღვოვანი კატასტროფები, როგორიცაა ინსულტი, მიოკარდიუმის ინფარქტი და მძიმე ჰიპერტონიული კრიზები - გაზაფხულზე უმეტესად მაგნიტურქარიშხლიან დღეებში ხდება.

მარტში იცვლება არტერიული წნევის მაჩვენებლები, სისხლში თრომბოციტების აგრეგაცია, ლიპიდური ცვლა, გლუკოზისადმი ტოლერანტობა, ორგანიზმის იმუნორეაქციულობა, მგრძნობელობა სხვადასხვა მედიკამენტისა თუ ტოქსიკური ნივთიერების მიმართ - ეს კი გულ-სისხლძარღვთა სისტემის პათოლოგიების გამწვავების მიზეზია. დაავადების სიმწვავე განსაკუთრებით 55 წლის ზემოთ ასაკის პაციენტებში იჩენს თავს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

დუმამ ბალტიისპირეთის ქვეყნები სსრკ-დან გამოყოფის შესახებ შეთანხმების დარღვევაში დაადანაშაულა

კობახიძე ერევანში ევროპული პოლიტიკური გაერთიანების (EPC) მე-8 სამიტში მონაწილეობისთვის ჩავიდა

რა მეთოდები გამოიყენება ჟურნალისტებისა და მედიის დისკრედიტაციისთვის

რეჟიმის მიერ წნეხში მოქცეული ქართული მედია - როგორ ხვდება ოცნების პირობებში პრესის თავისუფლების დღეს საქართველო