ჯანდაცვის მინისტრმა განსაკუთრებული დამსახურებისთვის ექიმები დააჯილდოვა

2016-12-23 16:47:51, 942 ნახვა

საზოგადოება

საქართველოს მედიცინის მუშაკთა დღესთან დაკავშირებით, შრომის, ჯანმრთელობისა და სოციალური დაცვის მინისტრმა, დავით სერგეენკომ ექიმები დააჯილდოვა.

მედიკოსებთან შეხვედრა ჯანდაცვის სამინისტროს ეროვნულ სასწავლო ცენტრში გაიმართა. დავით სერგეენკო რეგიონებში მომუშავე ექიმ-სპეციალისტებს, სასწრაფო სამედიცინო დახმარების, რეგიონული ჯანდაცვის ცენტრისა და სოფლის ექიმებს შეხვდა და მათ პროფესიული დღე მიულოცა.

შეხვედრის დასკვნით ნაწილში მინისტრმა მედიცინის 100-ზე მეტ მუშაკს განსაკუთრებული დამსახურებისთვის მადლობის სიგელები და მედლები გადასცა. ჯილდო რეგიონული სასწრაფო სამედიცინო დახმარების ცენტრსა და ჯანდაცვის სამინისტროს საგანგებო სიტუაციების კოორდინაციისა და რეჟიმის დეპარტამენტსაც გადაეცა.

ცნობისთვის, საქართველოს მედიცინის მუშაკთა პროფესიული დღე ყოველწლიურად, 23 დეკემბერს აღინიშნება.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან