თავდაცვის მინისტრი ზღვაში დაკარგული 2 ჯარისკაცის სამძებრო ღონისძიებებში პირადად ჩაერთო

2016-08-20 10:30:29, 853 ნახვა

სამხედრო

შავ ზღვაში დაკარგული ორი ჯარისკაცის სამძებრო ღონისძიებებში თავდაცვის მინისტრი ლევან იზორია ჩაერთო. მინისტრი თურქულ გემზე იმყოფება, რომელიც გონიოში დღეს 07:00 საათზე შევიდა.

სასაზღვრო ძალების 650-ტონიანი სამძებრო ხომალდი ყველა საჭირო ტექნიკით არის აღჭურვილი და სიღრმეში ძებნა-გადარჩენის ოპერაციებზეა გათვლილი.

ლევან იზორია ხომალდზე თურქეთის გენერალურ კონსულ იასინ თემისკანთან და აჭარის მთავრობის თავმჯდომარე ზურაბ პატარაძესთან ერთად იმყოფება.

შეგახსენებთ, რომ სპეციალური ოპერაციების ძალების ორმა სამხედრო მოსამსახურემ 16 აგვისტოს, შავ ზღვაზე გეგმიური საზღვაო სპეცდანიშნულების სწავლების დროს, ზღვაში სიღრმითი ჩაყვინთვის შემდეგ, ზღვის ზედაპირზე ამოსვლა ვერ შეძლო. მათი ადგილსამყოფელი ამ დრომდე დაუდგენელია.

მომხდართან დაკავშირებით სამხედრო პოლიციის დეპარტამენტში, მთავარ პროკურატურასთან შეთანხმებით, გამოძიება სისხლის სამართლის კოდექსის 116-ე მუხლის მეორე ნაწილით მიმდინარეობს, რაც გაუფრთხილებლობით სიცოცხლის მოსპობას გულისხმობს.