ქართველი მგზავრების თურქეთიდან გადმოსაყვანად ავიაკომპანია „ატლას გლობალმა“ რეისი დანიშნა

2016-07-16 13:06:17, 700 ნახვა

საზოგადოება

ავიაკომპანია "ატლას გლობალმა" სტამბოლიდან თბილისის მიმართულებით ავიარეისი დანიშნა, რომლითაც ათათურქის აეროპორტში მყოფი საქართველოს მოქალაქეები ისარგებლებენ, - ამის შესახებ „ექსპრესნიუსს“ საგარეო საქმეთა მინისტრის მოადგილე გიგი გიგიაძემ განუცხადა.

„მე ვესაუბრე რამოდენიმე საქართველოს მოქალაქეს. ისინი არიან უსაფრთხოდ და ელოდებიან თბილისკენ გამოფრენას. რაც შეეხება ზოგად ვითარებას, ამ დროისთვის, ჩემი მონაცემებით, ვითარება თურქეთში სტაბილური ხდება. სტამბული და ანკარა ხელისუფლების კონტროლს ექვემდებარება“, - განაცხადა გიგი გიგიაძემ.

შეგახსენებთ, რომ გუშინ გვიან ღამით თურქეთში სამხედრო გადატრიალების მცდელობა იყო. ამბოხის შედეგად დაიღუპა 60 და დაშავდა 100-მდე ადამიანი. ამ დრომდე, თურქეთის ზოგიერთ ქალაქში სროლის ხმა კვლავ ისმის. ამბოხის მცდელობის გამო, ათათურქის აეროპორტი დახურული იყო, რის გამოც ფრენები ყველა მიმართულებით გადაიდო. არსებული ინფორმაციით, საერთაშორისო ფრენები დღის ბოლომდე აღდგება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან