ამერიკის შეერთებულ შტატებში საქართველოს საელჩოს ორგანიზებით, ვაშინგტონში საქართველოს დამოუკიდებლობის აღდგენის 25 წლისთავისადმი მიძღვნილი საზეიმო მიღება გაიმართა.

საგარეო უწყების ინფორმაციით, ღონისძიების მონაწილეებს საქართველოს მხრიდან მისასალმებელი სიტყვით მიმართეს საქართველოს საგარეო საქმეთა მინისტრმა მიხეილ ჯანელიძემ, საქართველოს თავდაცვის მინისტრმა თინათინ ხიდაშელმა, აშშ-ში საქართველოს საგანგებო და სრულუფლებიანმა ელჩმა არჩილ გეგეშიძემ. აშშ-ს მხრიდან სახელმწიფო დეპარტამენტის მდივნის მოადგილე ტონი ბლინკენმა (Tony Blinken), თავდაცვის დეპარტამენტის მდივნის მოადგილე ელისა სლოტკინმა (Elissa Slotkin), და აშშ-ს საერთაშორისო განვითარების სააგენტოს ხელმძღვანელმა გეილ სმითმა (Gayle Smith).

ღონისძიებაზე გამომსვლელებმა განსაკუთრებულად ხაზი გაუსვეს საქართველოს და ამერიკის შეერთებულ შტატებს შორის არსებულ მრავალწლიან მეგობრულ და სტრატეგიულ ურთიერთობას.

ძალიან ემოციურია, რომ დამოუკიდებლობის დღის აღსანიშნავად ვაშინგტონში საქართველოს 800-ზე მეტი მეგობარი შეიკრიბა. ეს ადამიანები სხვადასხვა უწყებიდან, სხვადასხვა დროს საქართველოს გვერდით იდგა. იმ პროგრესში, რასაც საქართველომ მიაღწია დიდი წვლილი მიუძღვის ამერიკასა და საქართველოს შორის სტრატეგიულ პარტნიორობასა და თანამშრომლობას, ამერიკელი ხალხისა და მთავრობის დახმარებას ჩვენი დემოკრატიული ტრანსფორმაციის პროცესში. ჩვენ ამ ურთიერთობებს ძალიან ვაფასებთ და მომავალ წლებს დიდი პერსპექტივით ვუყურებთ. ჩვენ ხალხებს შორის მეგობრობის ძალიან მტკიცე საფუძველია ჩაყრილი და ეს პარტნიორობა მომავალში კიდევ უფრო განმტკიცდება. -განაცხადა საქართველოს საგარო საქმეთა მინისტრმა.

ღონისძიების ფარგლებში ღირსების ორდენით დაჯილდოვდნენ საქართველოს მეგობართა ჯგუფის (Georgia Caucus) თანათავმჯდომარე კონგრესმენი თედ პო (Ted Poe), აშშ-ს კომერციის დეპარტამენტის მდივნის მოადგილე ბრიუს ენდრიუსი (Bruce Andrews) და ჰეპატიტი C ელიმინაციის პროექტის ერთ-ერთი ინიციატორი, აშშ-ს ჯანდაცვის ეროვნული ინსტიტუტის ალერგიული და ინფექციური დაავადებების ნაციონალური ცენტრის დირექტორი ენტონი ფაუჩი (Anthony Fauci).

საქართველოს დამოუკიდებლობის დღისადმი მიძღვნილი მიღების ფარგლებში სტუმრების წინაშე საკუთარი შემოქმედებით წარსდგა მომღერალი ნინო ქათამაძე და კომპოზიტორი ნიკოლოზ რაჭველი, ასევე ადგილობრივი ფოლკლორული ანსამბლი „Dancing Crane Georgian Cultural Center".

ღონისძიების ფარგლებში მოწვეული სტუმრებისთვის გაიმართა სხვადასხვა გასართობი აქტივობები, მათ შორის გათამაშდა დასასვენებელი საგზურები საქართველოში, ქართული ღვინო და სასაჩუქრე კომპლექტი.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

იტალიის პრემიერ-მინისტრი პუტინის G20-ის სამიტზე მიწვევას ეწინააღმდეგება

მედია: ტრამპმა პაკისტანში ირანთან მოსალაპარაკებლად აშშ-ს დელეგაცია არ გაგზავნა

სუს: დავაკავეთ სუს-ის ყოფილი და შსს-ს მოქმედი თანამშრომელი, ბრალი ედება სუს-დან საიდუმლო ინფორმაციის გატანაში

ირაკლი [დაჩი] ბერაია აუდიტის სამსახურის უფროსის პირველ მოადგილედ დაინიშნა