2025-11-20 08:43:08, 613 ნახვა

---

„კაპიტულაციის ტოლფასია“. ტრამპმა უკრაინას შესთავაზა დონბასის დათმობა, არმიის განახევრება და პუტინს დაჰპირდა, რომ დაკავებულ ტერიტორიებს რუსეთის ტერიტორიად აღიარებდა

სტივენ ვიტკოფისა და კირილ დმიტრიევის მონაწილეობით შემუშავებულ უკრაინის ახალ სამშვიდობო გეგმაში, შეერთებული შტატები მოითხოვს, რომ უკრაინამ დათმოს ლუგანსკის და დონეცკის რეგიონების ყველა ტერიტორია და შეამციროს თავისი არმია ორჯერ. ამის შესახებ Financial Times-მა და Axios-მა ინიციატივასთან დაკავშირებულ წყაროებზე დაყრდნობით გაავრცელეს ინფორმაცია.

Axios-ის ცნობით, გეგმა ითვალისწინებს უკრაინის შეიარაღებული ძალების გაყვანას დონბასის 14%-დან და მის დემილიტარიზებულ ზონად გარდაქმნას, სადაც არცერთი მხარე არ შეინარჩუნებს ჯარებს ან იარაღს. სანაცვლოდ, კრემლმა უნდა გაყინოს ფრონტის ხაზი ზაპოროჟიესა და ხერსონის რეგიონებში და, გამოცემის წყაროების ცნობით, შესაძლოა, წარმატებული მოლაპარაკებების შემთხვევაში, ზოგიერთი მიწების დაბრუნებაზეც კი დათანხმდეს.

ტრამპის გეგმის თანახმად, შეერთებულმა შტატებმა და სხვა ქვეყნებმა ყირიმი და დონბასი რუსეთის ტერიტორიად უნდა აღიარონ. ეს უკრაინისგან არ არის მოთხოვნილი. თუმცა, მან რუსული ენა ოფიციალურ ენად უნდა აღიაროს და რუსეთის მართლმადიდებლური ეკლესიის საქმიანობაზე შეზღუდვები მოხსნას. ტრამპის გეგმა ასევე მოიცავს უკრაინის შეიარაღებული ძალებისთვის გარკვეული ტიპის იარაღის აკრძალვას, დასავლური შორი მოქმედების რაკეტების მიწოდების შეჩერებას და უკრაინაში ნებისმიერი უცხოური ჯარის განლაგების აკრძალვას, იუწყება FT.

ტრამპის წინადადება „უკრაინის კაპიტულაციის ტოლფასია“, წერს FT-ის კორესპონდენტი კრისტოფერ მილერი. მისი წყაროების ცნობით, გეგმა უბრალოდ კრემლის მაქსიმალისტური მოთხოვნების სიაა.

ამერიკელი ჩინოვნიკების ლოგიკაა, რომ უკრაინამ დონბასი უნდა დათმოს, რადგან ის მაინც დაკარგავს მას და ამიტომ „მის ინტერესებშია ახლავე შეთანხმების მიღწევა“, განუცხადა წყარომ Axios-ს.

 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი