2025-07-29 18:58:23, 1765 ნახვა

---

საქართველო-რუსეთის საზღვარზე უცხო ქვეყნის მოქალაქეებისა და მოქალაქეობის არმქონე პირებისთვის დროებითი განთავსების ცენტრი შეიქმნება.

სასაზღვრო პოლიცია დარიალის საკონტროლო-გამშვებ პუნქტზე სამშენებლო სამუშაოებს გეგმავს. პროექტი განკუთვნილია უცხო ქვეყნის მოქალაქეებისა და მოქალაქეობის არმქონე პირების დროებითი განთავსებისთვის, რომლებიც საქართველოში საერთაშორისო დაცვის მოთხოვნით შემოდიან, იუწყება Bm.ge.

სამუშაოების შესყიდვა გამარტივებული ფორმით (ტენდერის გარეშე) იგეგმება, ხოლო პროექტის სავარაუდო ღირებულება 299,990 ლარია. კონტრაქტორი იქნება „ბარსონა 21“.

კომპანიის აქციების 0% ბექა ბარსონიძეს ეკუთვნის, დარჩენილი 50% კი თამთა ჯანელიძეს. არსებული მონაცემებით, კომპანია, რომელიც 2021 წელს არის რეგისტრირებული, აქამდე არ მიუღია მონაწილეობა არცერთ სახელმწიფო შესყიდვაში. ამავდროულად, როგორც მითითებულია, კომპანიის თანამფლობელმა თამთა ჯანელიძემ 2021 წლის საარჩევნო კამპანიისთვის პარტია „ქართულ ოცნებას“ 5000 ლარი შესწირა.

დოკუმენტაციის თანახმად, შესყიდვის საფუძველი იყო 2025 წლის ივნისში მიღებული „საერთაშორისო დაცვის შესახებ“ კანონის მოთხოვნები. კანონი ძალაში შედის 2025 წლის 1 ოქტომბერს და სახელმწიფოსთვის ახალ ვალდებულებებს ითვალისწინებს.

ახალი კანონის თანახმად, უცხო ქვეყნის მოქალაქეს ან მოქალაქეობის არმქონე პირს უფლება აქვს, საერთაშორისო დაცვა პირდაპირ საზღვარზე ან სატრანზიტო ზონაში მიმართოს. განაცხადი განიხილება პირის საქართველოს ტერიტორიაზე შესვლის გარეშე (სანამ ის ე.წ. „მწვანე ზონაში“ იმყოფება). ეს, თავის მხრივ, მოითხოვს დროებითი საცხოვრებლისთვის სპეციალური სივრცის ხელმისაწვდომობას.

შინაგან საქმეთა სამინისტრო განმარტებით ბარათში მიუთითებს, რომ ბოლო თვეების განმავლობაში დარიალის საკონტროლო-გამშვებ პუნქტზე გახშირდა რუსეთის ფედერაციის მოქალაქეების მიერ საზღვრის გადაკვეთის მცდელობის შემთხვევები ბათილი დოკუმენტებით. ისინი ხშირად აცხადებენ, რომ უკრაინის მოქალაქეები არიან და სასჯელს რუსეთის ციხეებში იხდიან.

შინაგან საქმეთა სამინისტროს ცნობით, ასეთი შემთხვევები ხშირად რუსული მხარის მიერ განხორციელებული ე.წ. „დეპორტაციის“ ფარგლებში ხდება. ამ კონტექსტში, სამინისტრო გადაუდებლად მიიჩნევს დარიალის საკონტროლო-გამშვებ პუნქტზე საჭირო ინფრასტრუქტურის შექმნას, სახელმწიფო უსაფრთხოების ინტერესების გათვალისწინებით.

დოკუმენტში ხაზგასმულია, რომ კანონის ძალაში შესვლამდე, ანუ 2025 წლის 1 ოქტომბრამდე, შეუძლებელია პროექტის დასრულება სახელმწიფო შესყიდვების სტანდარტული პროცედურების გამოყენებით. ამიტომ, შინაგან საქმეთა სამინისტრო სახელმწიფო შესყიდვების სააგენტოს სთხოვს, დაუშვას გამარტივებული შესყიდვის პროცედურა (!).

სასაზღვრო პოლიცია აღნიშნავს, რომ საზღვრების დაცვის გარდა, სააგენტო ვალდებულია უზრუნველყოს ღირსეული დროებითი საცხოვრებელი პირობები საერთაშორისო დაცვის მაძიებელი უცხოელი მოქალაქეებისთვის. მათი თქმით, პროექტის განხორციელების შეფერხება სერიოზულ ზიანს მიაყენებს როგორც დეპარტამენტის ფუნქციონირებას, ასევე სახელმწიფო ინტერესებს.

გარდა ამისა, განცხადებაში ხაზგასმულია, რომ ასეთ სიტუაციებში რეაგირების დაგვიანება რისკებს ქმნის როგორც უსაფრთხოებისთვის, ასევე საქართველოს მიერ საერთაშორისო ვალდებულებების შესრულებისთვის.

შეგახსენებთ, რომ ამ დროისთვის დარიალის სასაზღვრო გამშვები პუნქტის სარდაფში (https://t.me/Tbilisi_life/41066), რომელიც 17–20 საწოლზეა გათვლილი, უკრაინის 95 მოქალაქეა განთავსებული, მათ შორის შვიდი ქალი.
მათი უმეტესობა იქ თითქმის ორი თვეა იმყოფება არაჰიგიენურ პირობებში, წყლის, საკვებისა და სამედიცინო მომსახურების ადეკვატური წვდომის გარეშე.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი