თბილისის საქალაქო სასამართლოს მოსამართლემ ნინო გალუსტაშვილმა 21 წლის სამედიცინო უნივერსიტეტის სტუდენტ გიორგი მინდაძეს ხუთი წლით თავისუფლების აღკვეთა მიუსაჯა. მას ბრალი წაუყენეს პოლიციელზე თავდასხმაში თბილისში პროევროპული აქციის დროს.

საქმეში დაზარალებული ინსპექტორი შმაგი ჯაჭვაძე იყო. ერთ-ერთ სასამართლო სხდომაზე მან განაცხადა, რომ პიროტექნიკური მუხტის ფრაგმენტი მის ფეხზე დაეცა, რამაც დამწვრობა გამოიწვია. მისი თქმით, „პირი, ვინც აღნიშნული პიროტექნიკა წყლის ჭავლის მიმართულებით გაისროლა“, სასამართლო დარბაზში - ბრალდებულის სკამზე იმყოფებოდა.

სხდომის დაწყებამდე, თბილისის საქალაქო სასამართლოში ბრალდებულების მხარდასაჭერად მისულ მოქალაქეებსა და მანდატურის სამსახურის თანამშრომლებს შორის შეტაკება მოხდა. სხდომა ბოლო მომენტში გადაიტანეს პატარა სასამართლო დარბაზში #10, რომელიც დაახლოებით 25 ადამიანისთვის იყო განკუთვნილი. ამან გამოიწვია მინდაძეების ოჯახის წევრების, აქტივისტებისა და სხვა მოქალაქეების აღშფოთება, რომლებსაც შიგნით შესვლა არ შეეძლოთ. მომიტინგეები მოითხოვდნენ, რომ სხდომა ყველასთვის ხელმისაწვდომ ოთახში გადაეტანათ, თუმცა მოსამართლე ნინო გალუსტაშვილმა ადვოკატების შუამდგომლობა არ დააკმაყოფილა და სხდომა პატარა ოთახში განაგრძო.
სასამართლოს ფოიეში ჩხუბი დაიწყო, რის შემდეგაც მანდატურის სამსახურმა მომიტინგეების ნაწილი შენობიდან გააძევა, სასამართლო დარბაზში შესასვლელი გადაიკეტა და მოქალაქეებს სასამართლოში გადაადგილება შეეზღუდათ. შენობის შესასვლელთან და ეზოში პოლიციის პატრული იყო განლაგებული.

ფოიეში მომხდარი ინციდენტის შედეგად, ქალს სამედიცინო დახმარება დასჭირდა. მოგვიანებით, აქტივისტი ლადო ჯახუა კლინიკაში მოათავსეს. თვითმხილველების თქმით, მას მანდატურებმა ფიზიკური შეურაცხყოფა მიაყენეს და სავარაუდოდ, ცხვირი მოიტეხა.

გიორგი მინდაძეს ბრალი სისხლის სამართლის კოდექსის 353-ე მუხლით - „პოლიციელზე თავდასხმა“ - წაუყენეს. გამომძიებლების ინფორმაციით, 2024 წლის 29 ნოემბერს, თბილისში ერთ-ერთი მასობრივი საპროტესტო აქციის დროს, მან გამოიყენა პიროტექნიკური მოწყობილობა, რომელიც, სავარაუდოდ, პოლიციელს მოხვდა და ფეხი დაუზიანა. პროკურატურამ მტკიცებულებად წარმოადგინა მინდაძის ფოტოსურათი, სადაც ხელში პიროტექნიკა უჭირავს და ერთი პოლიციელის ჩვენება.

ავტორი: ექსპრესნიუსი,

სოციალური ქსელები

ძვლის ტვინის გადანერგვის შემდეგ გართულების სამკურნალო "ჯაკავი" დაფინანსდება – ჯანდაცვა

რუსეთი საქართველოს მოუწოდებს, ალის გამოუყენებლობის შესახებ იურიდიულად სავალდებულო შეთანხმება შეიმუშაონ

ბარციცი: საქართველო ძალის გამოუყენებლობის შეთანხმებაზე დამატებით პროგრესს შეუძლებელს ხდის

მოსკოვი საქართველოს ოკუპირებულ ცხინვალთან და აფხაზეთთან ძალის გამოუყენებლობის შესახებ შეთანხმების გაფორმებისკენ მოუწოდებს