61-ე წელში გადავედი კაცი, ათასი რამ მინახავს, მაგრამ შიმშილობა მიმართული იყოს არა ხელისუფლების წინააღმდეგ რაღაც მოთხოვნით, არამედ თვითონ ოპოზიციის შიგნით, რაღაცებში გადასარწმუნებლად, არათუ მინახავს, არც მსმენია, - ამის შესახებ „ქართული ოცნების“ დეპუტატმა, თენგიზ შარმანაშვილმა განაცხადა, რითაც შეაფასა „კოალიცია ცვლილებისთვის“ ერთ-ერთი ლიდერის, ელენე ხოშტარიას განცხადება, რომ შიმშილობას შეწყვეტს, თუ ოპოზიცია შეთანხმდება და თვითმმართველობის არჩევნებში მონაწილეობას არ მიიღებს.

მისი თქმით, ხოშტარიას ამ განცხადებას ოპოზიციაშიც კრიტიკული შეფასებები მოჰყვა და „თვითონაც კი მიხვდნენ, რომ ეს იყო უკიდურესად წარმოუდგენელი ნაბიჯი".

„61-ე წელში გადავედი კაცი. მე ეროვნული მოძრაობიდან მოყოლებული, დიდი ხანია პოლიტიკაში ვარ, მათ შორის, მიშიმშილია კიდეც. ათასი რამ მინახავს ამ ქვეყანაზე, მაგრამ შიმშილობა მიმართული იყოს არა ხელისუფლების წინააღმდეგ რაღაც მოთხოვნით, არამედ თვითონ ოპოზიციის შიგნით, რაღაცებში გადასარწმუნებლად, ასეთი რამ არათუ მინახავს, არც მსმენია. მართლა არასერიოზული და არათანმიმდევრული ხალხია. ნახეთ ახლა, მის ამ განცხადებას, თვითონ ოპოზიციაში რა შეფასებები აქვთ. თვითონაც კი მიხვდნენ, რომ ეს იყო უკიდურესად წარმოუდგენელი ნაბიჯი. არათუ გაუთვლელი, არამედ ყოველგვარი ლოგიკისაგან დაცლილი. ეს არის მათი სახე. ერთმანეთი ეჯავრებათ და აბსოლუტურად ალოგიკურ ნაბიჯებს დგამენ.

მოდით, ამ 2-დღიან შიმშილობის ისტორიას გადავხედოთ. როდესაც მე ვიწყებდი შიმშილობას ან ვინმე, ჩვენ წინასწარ გვქონდა განსაზღვრული, რა მოთხოვნები უნდა გვქონოდა. იყო ეს შიმშილობა დაწყებული მოთხოვნაზე - „მოდი გავერთიანდეთ"?! არა. დაიწყეს აბსოლუტურად გაუთვლელი შიმშილობა. მერე დაინახეს, რომ ამას ხალხი არ აჰყვა და ეს პოპულარული არაა ხალხში. მერე ეძებდნენ აქედან ლამაზად გამოსვლის გზებს და იპოვეს ვითომ, ასეთი გამოსავალი, ყოვლად არათანმიმდევრული“, - განაცხადა შარმანაშვილმა.

ცნობისთვის, „კოალიცია ცვლილებისთვის” ერთ-ერთი ლიდერი ელენე ხოშტარია აცხადებს, რომ შიმშილობას შეწყვეტს, თუ ოპოზიცია შეთანხმდება, რომ თვითმმართველობის არჩევნებში მონაწილეობას არ მიიღებს. კერძოდ, „პალიტრანიუსის“ გადაცემის „პოლიტ ქალაქის“ წამყვანის კითხვაზე: „თუ ოპოზიცია შეთანხმდება და იტყვის, რომ არ მივდივართ არჩევნებზე, შეწყვეტთ შიმშილობას?“, ელენე ხოშტარიამ უპასუხა: „კი“.

ავტორი: ექსპრესნიუსი,

სოციალური ქსელები

ირანმა გადაწყვიტა, რომ აშშ-სთან ორკვირიანი ცეცხლის შეწყვეტის ფარგლებში ჰორმუზის სრუტეში გადასასვლელად გადასახადი დააწესოს

ტრამპმა ირანთან ომში ორკვირიანი ცეცხლის შეწყვეტა გამოაცხადა. თეირანმა შეერთებულ შტატებზე „დიდი გამარჯვება“ გამოაცხადა.

დიდი ბრიტანეთი ტრამპს აუკრძალავს მისი ბაზების გამოყენებას ირანის ხიდებსა და ელექტროსადგურებზე თავდასხმებისთვის

სახელისუფლებო აქტორებმა პატრიარქის სახელი ოპონენტების დისკრედიტაციისთვის გამოიყენეს