საია სასამართლოს სარჩელით მიმართავს და არჩევნების შემაჯამებელი ოქმის ბათილად ცნობას და შედეგების გაუქმებას მოითხოვს

2024-11-18 14:02:30, 407 ნახვა

საზოგადოება

"საქართველოს ახალგაზრდა იურისტთა ასოციაცია" (საია) თბილისის საქალაქო სასამართლოს სარჩელით მიმართავს და 26 ოქტომბრის საპარლამენტო არჩევნების შემაჯამებელი ოქმის ბათილად ცნობას და შედეგების გაუქმებას მოითხოვს.

როგორც საიას მიერ სოციალურ ქსელში გავრცელებულ განცხადებაშია აღნიშნული, ორგანიზაცია ხელახალი არჩევნების დანიშვნასაც ითხოვს.

"საია აგრძელებს ბრძოლას 2024 წლის საპარლამენტო არჩევნებზე ხმის ფარულობის დარღვევის ფაქტებზე.

საია თბილისის საქალაქო სასამართლოს მიმართავს სარჩელით, რომელიც ეხება 2024 წლის საპარლამენტო არჩევნებზე ხმის ფარულობის მასობრივ დარღვევას.

საია მოითხოვს:

ცესკოს მიერ მიღებული 2024 წლის საპარლამენტო არჩევნების შემაჯამებელი ოქმის ბათილად ცნობას

არჩევნების შედეგების გაუქმებას

ხელახალი არჩევნების დანიშვნას

ხმის მიცემის ფარულობა საქართველოს კონსტიტუციით გარანტირებული უფლებაა და მისი დარღვევა დაუშვებელია.

ეს უფლება არის დემოკრატიული პროცესების საფუძველი, ხოლო მისი უგულებელყოფა არღვევს საარჩევნო პროცესის ლეგიტიმაციას",- ნათქვამია განცხადებაში.