ბუღაძე - რა იქნება გეგმა? გეგმა გულისხმობს იმას, რომ ადამიანი გამოვიდეს პირადი კომფორტის ზონიდან და ქუჩაში დადგეს [ვიდეო]

2024-11-18 13:22:28, 444 ნახვა

პოლიტიკა

ყველა გვეკითხება, რა იქნება გეგმა? გეგმა გულისხმობს იმას, რომ ადამიანი გამოვიდეს პირადი კომფორტის ზონიდან, გამოვიდეს “ფეისბუქიდან“, სოციალური ქსელებიდან და გამოვიდეს ქუჩაში,- ამის შესახებ მწერალმა ლაშა ბუღაძემ თბილისში, ჭავჭავაძის გამზირზე “ექსპრესნიუსთან“ განაცხადა, სადაც კარვებია გაშლილი და 24-საათიანი პროტესტია დაგეგმილი.

ბუღაძის თქმით, “ქართულ ოცნებას“ არჩევნების ლეგიტიმაციის საშუალებას არ მისცემენ“.

“ჩვენი პროტესტი ყველამ იცის რის წინააღმდეგაც არის. “ქართულმა ოცნებამ“ გააყალბა არჩევნები, ჩვენ მათ არ მივცემთ ლეგიტიმაციის საშუალებას, ამ ბანდიტურ დაჯგუფებას...

ყველა გვეკითხება, რა იქნება გეგმა? გეგმა ეს არის, არის რთული დღეები და ამ პროცესში გეგმა გულისხმობს იმას, რომ ადამიანი გამოვიდეს პირადი კომფორტის ზონიდან, გამოვიდეს “ფეისბუქიდან“, სოციალური ქსელებიდან და გამოვიდეს ქუჩაში. რაც უფრო მეტი ხალხი იქნება, მით უფრო მალე მივაღწევთ მიზანს...

ბატონ კალანდარიშვილს დამღა რომ აქვს პირდაპირი და გადატანითი მნიშვნელობით, თუ ისევ ამ ხალხმა უნდა ჩაატაროს არჩევნები, ხომ ვნახეთ, რა არჩევნები ჩაატარეს? ეს იქნება მათი ბოლო არჩევნები. პოლიტიკა ქრება და საქართველო კარგავს პერსპექტივას. ამიტომ, აქ ხალხი უნდა ენაცვლებოდეს ერთმანეთს, ვიღაც წავა, ვიღაც მოვა. პროტესტის გრძნობა არის და უნდა იყოს!“- განაცხადა ბუღაძემ.

შეგახსენებთ, გუშინ, 17 ნოემბერს თბილისში, ჭავჭავაძის გამზირზე კარვები გაშალეს. აქციის მონაწილეებმა, რომლებიც 26 ოქტომბრის საპარლამენტო არჩევნების შედეგებს არ აღიარებენ და ხელახალ არჩევნებს ითხოვენ, პროტესტის ნიშნად ღამე თბილისის სახელმწიფო უნივერსიტეტის პირველი კორპუსის მიმდებარე ტერიტორიაზე, გაშლილ კარვებში გაათენეს. ცნობილია, რომ ჭავჭავაძის გამზირზე პროტესტის ეს ფორმა 20:00 საათამდე გაგრძელდება.