2023-04-04 11:39:24, 825 ნახვა

---

გრიგორიადისის ადვოკატი - სამჯერ და ოთხჯერ უთხრა უარი, რომ არ სურდა თმის გადაპარსვა, მერე იძულებული გავხდი გადამეპარსა თმაო

ლაზარემ ადვოკატებს განგვიმარტა, რომ სამჯერ და ოთხჯერ უთხრა უარი და განუმარტა, რომ არ სურდა მას თმის გადაპარსვა, რაზედაც თქვა, რომ ჩამაცივდნენო და მერე იძულებული გავხდი გადამეპარსა თმაო,- ამის შესახებ  ლაზარე გრიგორიადისის ადვოკატმა, ლიკა ბითაძემ განაცხადა.

ბითაძის თქმით, როდესაც გრიგორიადისი დააკავეს, იგი გადაყვანილი იქნა პოლიციის დეპარტამენტში, სადაც შეეზღუდა ადვოკატის უფლებაც.

"ლაზარემ ადვოკატებს განგვიმარტა, რომ სამჯერ და ოთხჯერ უთხრა უარი და განუმარტა, რომ არ სურდა მას თმის გადაპარსვა, რაზედაც თქვა, რომ ჩამაცივდნენო და მერე იძულებული გავხდი გადამეპარსა თმაო. ეს მოხდა ჩემი ნების საწინააღმდეგოდო. როდესაც დააკავეს, იგი გადაყვანილი იქნა პოლიციის დეპარტამენტში და იქ შეეზღუდა ადვოკატის უფლება, როდესაც დაკავებისთანავე აქვს ადვოკატის ყოლის უფლება. სახალხო დამცველის წარმომადგენლები იყვნენ შემოსულებიო, გამომკითხესო საქმის გარემოებებიო, მაგრამ ეს დეტალები მათთვის არ მომიყოლიაო",- განაცხადა ბითაძემ.

შეგახსენებთ, "უცხოური აგენტების" კანონპროექტის წინააღმდეგ საპროტესტო აქციებში მონაწილე ლაზარე გრიგორიადისი 29 მარტს დააკავეს. 21 წლის ახალგაზრდას პოლიციელზე თავდასხმასა და ცეცხლის წაკიდებით სხვისი ნივთის დაზიანებას ედავებიან.

შსს-ს ინფორმაციით, გამოძიებით დადგინდა, რომ ლაზარე გრიგორიადისმა მიმდინარე წლის 7, 8, 9 მარტს, თბილისში, რუსთაველის გამზირზე გამართულ საპროტესტო აქციაზე პოლიციის თანამშრომლებს ესროლა ქვები და ე.წ. მოლოტოვის კოქტეილები, რის შედეგადაც დაზიანება მიიღეს სამართალდამცველებმა. ასევე, მან ცეცხლი წაუკიდა შინაგან საქმეთა სამინისტროს კუთვნილ ავტომობილს. აღნიშნულ ფაქტებზე გამოძიება სისხლის სამართლის კოდექსის 353-ე პრიმა და 187-ე მუხლებით წარიმართა.

31 მარტს, თბილისის საქალაქო სასამართლომ გრიგორიადისს აღკვეთის ღონისძიების სახით წინასწარი პატიმრობა შეუფარდა.

2 აპრილს, 21 წლის ახალგაზრდის უფლებადამცველმა, ლიკა ბითაძემ აღკვეთის ღონისძიების შესახებ პირველი ინსტანციის გადაწყვეტილება თბილისის სააპელაციო სასამართლოში გაასაჩივრა და პატიმრობის შეცვლა გირაოთი მოითხოვა.

გუშინ, 3 აპრილს ადვოკატმა მედიასთან საუბრისას განაცხადა, რომ ლაზარე გრიგორიადისს, დაკავების შემდეგ, დაემუქრნენ - იმ შემთხვევაში თუ ის აღიარებით ჩვენებას ხელს არ მოაწერდა, მის მეგობარს დაიჭერდნენ. ადვოკატის ინფორმაციითვე, 21 წლის ახალგაზრდას პენიტენციურ დაწესებულებაში თმა მისი ნების საწინააღმდეგოდ გადაპარსეს.

ლიკა ბითაძის აღნიშნულ განცხადებებს გუშინვე გამოეხმაურა სპეციალური პენიტენციური სამსახური, რომელმაც გავრცელებულ განცხადებაში განმარტა, რომ ბრალდებულმა პატიმრობის კოდექსის 36-ე მუხლით გათვალისწინებული საპარიკმახერო მომსახურების უფლებით ისარგებლა და რომ "სიმართლეს არ შეესაბამება ინფორმაცია, თითქოს მას თმა მთლიანად გადაპარსეს, მით უმეტეს მისი ნების საწინააღმდეგოდ". 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი