2023-01-11 13:00:00, 1407 ნახვა

---

„თარჯიმნად მოწვეული პირი არის მიკერძოებული“ - პენიტენციურმა სააკაშვილის პროცესზე ლევან მეტრეველის აცილება მოითხოვა

სასამართლოს მივმართავთ შუამდგომლობით, რომ აცილებული იქნას თარჯიმნად ლევან მეტრეველი, - ამის შესახებ მესამე პრეზიდენტის სასამართლო პროცესზე პენიტენციური სამსახურის წარმომადგენელმა განაცხადა.

მისი თქმით, თარჯიმნად მოწვეული პირი ცალსახად მიკერძოებულია.

"წინა სხდომის შემდეგაც, ბატონი ლევან მეტრეველის, რომელიც ჩვენს პროცესებზე თარჯიმნად მონაწილეობს, განცხადებებს ჰქონდა ადგილი. განცხადებები ეხებოდა პენიტენციურ სამსახურს, მის წარმომადგენლებს და ვფიქრობ, ამ შემთხვევაში, თარჯიმნად მოწვეული პირი არის ცალსახად მიკერძოებული და არსებობს აცილების საფუძველი. შესაბამისად, სასამართლოს მივმართავთ შუამდგომლობით, რომ აცილებული იქნას თარჯიმნად ლევან მეტრეველი", - თქვა პენიტენციური სამსახურის წარმომადგენელმა.

მიხეილ სააკაშვილის უფლებადამცველი არ დაეთანხმა პენიტენციურის განცხადებას და აღნიშნა, რომ შუამდგომლობა უსაფუძვლო იყო და არ უნდა დაკმაყოფილებულიყო.

"მხარეს ის არანაირად არ წამოადგენს. იგი გაფრთხილებულია ცრუ ან არასწორი თარგმნის და ა.შ. სისხლის სამართლის პასუხისმგებლობით თქვენს მიერ. თუ რამე კანონს დაარღვევს ან რამე უკანონობას ექნება ადგილი, დადგება მისი სისხლის სამართლებრივი პასუხისმგებლობა. მსგავსი რამე მხარეს არ წარმოუდგენია. მხარეს არ დაუსახელებია არც ერთი არგუმენტი, რომ ის არასწორად ან მიკერძოებულად თარგმნის და შესაბამისად, ჩვენ ვთვლით, რომ აღნიშნული შუამდგომლობა არის უსაფუძვლო და იგი არ უნდა დაკმაყოფილდეს", - განაცხადა ხაჭაპურიძემ.

მოსამართლე გიორგი არევაძემ შუამდგომლობა არ დააკმაყოფილა, თუმცა თარჯიმანს მოუწოდა, რომ საჯარო სივრცეში განცხადებებისგან თავი შეიკავოს.

ცნობისთვის, თბილისის საქალაქო სასამართლო მესამე პრეზიდენტის სასჯელის გადავადების ან სასჯელისგან გათავისუფლების შუამდგომლობაზე მსჯელობს. პროცესს თავად მიხეილ სააკაშვილი არ ესწრება.

ექსპრეზიდენტის გათავისუფლების ან სასჯელის გადავადების მოთხოვნით, მისმა ადვოკატმა, შალვა ხაჭაპურიძემ სასამართლოს შუამდგომლობით 1-ელ დეკემბერს მიმართა.

შუამდგომლობას წინ უძღოდა წამების მსხვერპლთა ფსიქოლოგიური რეაბილიტაციის ცენტრ "ემპათიას" დასკვნა, რომლის მიხედვითაც მიხეილ სააკაშვილს 20-ზე მეტი დიაგნოზი თუ სიმპტომო-კომპლექსი აღენიშნება, აქედან წამყვანია, დაახლოებით, 10 დიაგნოზი, რაც შეუთავსებელს ხდის პატიმრობას.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი