სამხრეთ კავკასიის სამ ქვეყანას შორის - აზერბაიჯანი, სომხეთი და საქართველო - ამ უკანასკნელმა რუსეთ-უკრაინის ომი გულთან ყველაზე მეტად ახლოს მიიტანა, მაგრამ გასათვალისწინებელი მხოლოდ ერთ რამ აღმოჩნდა, საქართველო-რუსეთის ისედაც დაძაბული ურთიერთობების გათვალისწინებით, კიევი ამ სიტუაციაში საქართველოსგან მეტს ელოდა.

თუ სომხეთისთვის და აზერბაიჯანისთვის რუსეთი მოკავშირე და პარტნიორია, რომელიც მონაწილეობს ყარაბაღის კონფლიქტის მოგვარებაში, მაშინ საქართველოსთვის ის „აგრესორი“ და „ოკუპანტია“, რომელმაც აფხაზეთი და სამხრეთ ოსეთი მიითვისა.

უკრაინის მიმართ სოლიდარობა ქართულ საზოგადოებაში საკმაოდ ძლიერი აღმოჩნდა.

საქართველოდან რეგულარულად იგზავნებოდა და იგზავნება ჰუმანიტარული დახმარება, ქვეყანა იღებს უკრაინელ ლტოლვილებს და ჰააგის საერთაშორისო სისხლის სამართლის სასამართლოში უკრაინაში რუსეთის ქმედებების გამოძიების ერთ-ერთი ინიციატორი გახდა. მაგრამ ამავე დროს, საქართველოს ხელისუფლება ფრთხილი აღმოჩნდა და ღიად არ ეწინააღმდეგება რუსეთს. 

საქართველოს პრემიერ-მინისტრმა, ირაკლი ღარიბაშვილმა არაერთხელ განაცხადა, რომ საქართველო არ შეუერთდება ანტირუსულ სანქციებს, რადგან ამან შესაძლოა ქვეყანა რისკის ქვეშ დააყენოს. თავად რუსეთმა მოულოდნელად გააუქმა საქართველოსთვის რძის პროდუქტებზე დაწესებული სანქციები, თუმცა როგორც საქართველოს სოფლის მეურნეობის სამინისტრო ამტკიცებს, ამის შესახებ განცხადება ჯერ კიდევ 2020 წელს შევიდა.

თავად უკრაინა არ მალავდა იმედგაცრუებას საქართველოს მისამართით. უკრაინის უმაღლესი რადას თავმჯდომარე, რუსლან სტეფანჩუკმა თამამად უსაყვედურა ქართველ კოლეგებს და განაცხადა, რომ სანქციების მოხსნა შემთხვევითი არ იყო, რომ თბილისს არ სურდა უკრაინის სრული მხარდაჭერა და საქართველოში რძის პროდუქტების 15 კომპანიისთვის შეზღუდვების მოხსნას უფრო მეტი ფასი აღმოაჩნდა, ვიდრე საქართველო-უკრაინის ათასწლიან მეგობრობას, მრავალწლიან ერთობლივ ბრძოლას და ორმხრივ მისწრაფებებს.

უკრაინული მხარის ამ და სხვა პრეტენზიებმა განაპირობა ის, რომ მარტის ბოლოს უკრაინის პრეზიდენტმა, ვოლოდიმირ ზელენსკიმ გადაწყვიტა უკრაინის ელჩი თბილისიდან გაეწვია. რის შემდეგაც ცნობილი გახდა, რომ საქართველო მაინც შეუერთდა სანქციებს, ანუ საქართველომ არ დააწესა საკუთარი სანქციები, არამედ ნაწილობრივ მხარი დაუჭირა საერთაშორისოს - მაგალითად, რუსი ფიზიკური და იურიდიული პირებისთვის ფინანსური ოპერაციები შეეზღუდა.

აღნიშნული უთანხმოებების მიუხედავად, რუსეთ-უკრაინის ომის შედეგად დაზარალებული უკრაინელი ხალხის დახმარების პროცესში ქართული კომპანიები პირველივე დღეებიდან ჩაერთნენ. 

• აფთიაქების ქსელებმა GPC-მ და „ფარმადეპომ“ უკრაინაში ჰუმანიტარული დახმარება და მედიკამენტები გაგზავნეს. საქართველოში მყოფი უკრაინის მოქალაქეებისთვის კი 1 მლნ ლარის ჰუმანიტარული დახმარება გამოჰყვეს. 
• სააფთიაქო ქსელმა PSP-მ უკრაინელი ხალხისთვის გასაგზავნად 200 000 ლარის მედიკამენტები და პირველადი დახმარებისთვის საჭირო ნივთები საქართველოს ჯანდაცვის სამინისტროს უსასყიდლოდ გადასცა.
• „ავერსმა“ ჯანდაცვის სამინისტროსა და ჰუმანიტარულ ორგანიზაციებს უკრაინაში გასაგზავნად მედიკამენტები და პირველადი მოხმარების საგნები გადასცა. 
• „ევექსი კლინიკები“ უკრაინელებს უსასყიდლოდ სთავაზობდა სამედიცინო კონსულტაციასა და გადაუდებელ ამბულატორიულ მომსახურებას. სამედიცინო ცენტრი „ვივამედმა“ უკრაინის მოქალაქეებს, სამედიცინო მომსახურებას უფასოდ შესთავაზა. 
• ტელეკომპანია „ფორმულამ“ შექმნა ფონდი, სადაც მისი დონაცია 500 000 ლარს შეადგენდა.  
• საქართველოს პირველმა არხმა, წითელ ჯვართან ერთად, უკრაინელი ხალხის მხარდასაჭერად და უკრაინის საზოგადოებრივი მაუწყებლის სოლიდარობის ნიშნად, საქველმოქმედო მარათონი გამართა, რომელშიც საქართველოს ბიზნეს ასოციაციაც ჩაერთო. 
• კომპანია „სილქნეტმა“ როგორც მობილური, ისე ფიქსირებული ქსელიდან, უკრაინის მიმართულებით ზარები უფასო გახადა. ასევე, კომპანია „ბილაინის“ ქსელიდან უკრაინის მიმართულებით ზარების განხორციელება და შეტყობინებების გაგზავნა უფასოდ გახდა შესაძლებელი.
• „თიბისი ბანკმა“ შექმნა საქველმოქმედო ფონდი, სადაც მისი შენატანი 200 000 ლარი იყო.  
• „საქართველოს ბანკის“ ინიციატივით, პარტნიორ კომპანიებთან ერთად და წითელი ჯვრის მხარდაჭერით, უკრაინას ჰუმანიტარული დახმარება გადასცაქ. ბანკი ასევე, პარტნიორ სასტუმროებთან ერთად, უკრაინიდან იძულებით გადაადგილებული პირებისთვის საცხოვრებელ ადგილებს უზრუნველყოფდა. გარდა ამისა, „საქართველოს ბანკმა“ საკუთარ ფონდში - „სიცოცხლის ხე“ 250 000 ლარი გადარიცხა.
• „ლიბერთი ბანკის“ გადაწყვეტილებით, საქართველოში მყოფ უკრაინის ყველა მოქალაქეს საერთაშორისო ფულადი გზავნილებით სარგებლობისას საკომისიოს გადახდა არ უწევდათ.
• „საქართველოს ფოსტა“ ფიზიკური პირებისგან უსასყიდლოდ იღებდა და აგზავნიდა ჰუმანიტარული დანიშნულების ამანათებს უკრაინის მიმართულებით. 
• კომპანიებმა GPR Nuts-მა, „ბერტამ“, „კამპამ“, „ კულამ“, „კლინტექმა“ და „კერკმა“, უკრაინელი ხალხისთვის, სააგენტოს „აწარმოე საქართველოში“ საკუთარი ნაწარმი გადასცეს. პროდუქციის ნაწილი უკრაინაში გაიგზავნა, ნაწილი კი საქართველოში დარჩენილ უკრაინის მოქალაქეების გადასცა. წამოწყებას კომპანია „გეფერინი“ შეუერთდა, რომელმაც სააგენტოს უკრაინაში გასაგზავნად 12 ათასი ლარის ღირებულების ფეხსაცმელი გადასცა.

გარდა ამისა, საქართველოს საგარეო უწყებამ 27 თებერვალს, გამოაქვეყნა იმ ნაბიჯების ჩამონათვალი, რომლებიც უკრაინის მხარდასაჭერად ხელისუფლებამ გადადგა.  

პირველი ნაწილი მოიცავს საქართველოს მხრიდან უკრაინის სუვერენიტეტისა და ტერიტორიულ მთლიანობის მხარდაჭერას საერთაშორისო ორგანიზაციებში:

• შეუერთდა ევროკავშირის დეკლარაციას რუსეთის ფედერაციის შეიარაღებული ძალების მიერ უკრაინაში შეჭრის თაობაზე;
• თანასპონსორობა გაუწია გაერო-ს უსაფრთხოების საბჭოს რეზოლუციას რუსეთის მიერ უკრაინაში შეჭრის შესახებ;
• მხარი დაუჭირა ევროპის საბჭოს მინისტრთა კომიტეტის გადაწყვეტილებას რუსეთისთვის მინისტრთა კომიტეტსა და საპარლამენტო ასამბლეაში წარმომადგენლობითი უფლების შეჩერების შესახებ;
• ეუთო-ს მუდმივი საბჭოს გაძლიერებულ სხდომაზე შეშფოთება გამოთქვა რუსეთის მიერ უკრაინის წინააღმდეგ განხორციელებული აგრესიის გამო და ხაზი გაუსვა საერთაშორისო თანამეგობრობის ერთიანი და მტკიცე პასუხის აუცილებლობას;
• შეუერთდა ყირიმის საერთაშორისო პლატფორმის ერთობლივ განცხადებას და კიდევ ერთხელ გამოთქვა მხარდაჭერა უკრაინის ტერიტორიული მთლიანობისა და სუვერენიტეტის მიმართ;
• გაერო-ს გენერალური ასამბლეის მეთერთმეტე საგანგებო სესიაზე საქართველოს წარმომადგენელმა გააკეთა ეროვნული განცხადება და მოუწოდა რუსეთის ფედერაციას დაუყოვნებლივ შეწყვიტოს სამხედრო მოქმედებები და გაიყვანოს სამხედრო ძალები უკრაინის ტერიტორიიდან.

მეორე ნაწილში თავმოყრილია უკრაინის მხარდამჭერი ოფიციალური განცხადებები, მათ შორის, Twitter-ზე საქართველოს პრეზიდენტისა და პრემიერ-მინისტრის მიერ დაწერილი პოსტები. 

მესამე ნაწილში, რომლის სათაურიც „ჰუმანიტარული დახმარება და სოლიდარობაა", უკრაინისთვის გაწეული ჰუმანიტარული დახმარების გარდა, ნახავთ უკრაინის დროშის ფერებში თბილისის ანძისა და ბათუმის სტადიონის განათების ფაქტის აღნიშვნასაც.

• 1 მილიონი ლარის ჰუმანიტარული დახმარება უკრაინას;
• დახმარება საქართველოში მყოფ ვიზიტორ უკრაინელებს;
• 24/7 ცხელი ხაზი უკრაინელი ტურისტებისთვის;
• თბილისის ანძა და ბათუმის სტადიონი განათდა უკრაინის სახელმწიფო დროშის ფერებში;
• პრეზიდენტის სასახლეზე უკრაინისა და საქართველოს დროშები;
• „საქართველოს ფოსტა“ უფასოდ აგზავნის ჰუმანიტარული დანიშნულების ამანათებს უკრაინის მიმართულებით.

ამასთან, სულ ცოტახნის წინ, საქართველოს პრემიერ-მინისტრმა ირაკლი ღარიბაშვილმა უკრაინელი ხალხისთვის ჰუმანიტარული დახმარების მიზნით გენერატორების შეძენის გადაწყვეტილება მიიღო.

როგორც პრემიერმა აღნიშნა, ეკონომიკისა და მდგრადი განვითარების სამინისტროს ბრძანების შესრულება უმოკლეს ვადაში დაევალა.

გენერატორების ზუსტი რაოდენობა და მათი შესყიდვისთვის გამოყოფილი თანხა ჯერ არ დასახელებულა.

ამასთან, როგორც მთავრობის ადმინისტრაციის ხელმძღვანელმა, რევაზ ჯაველიძემ განაცხადა, ომის დაწყებიდან საქართველოს მთავრობა არასოდეს უგულებელყოფდა უკრაინის დახმარებას თავისი შესაძლებლობების ფარგლებში.

მისივე თქმით, საქართველომ უკრაინის ჰუმანიტარული დახმარებისთვის სულ 32 მილიონი ლარი (12 მილიონ დოლარამდე) დახარჯა.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება