2022-03-17 23:23:21, 1007 ნახვა

---

პარლამენტში, ვახტანგ გომელაურმა სამინისტროს მიერ 2021 წელს გაწეული საქმიანობისა და სამომავლო გეგმების შესახებ ისაუბრა

შინაგან საქმეთა მინისტრმა, ვახტანგ გომელაურმა საქართველოს პარლამენტში, „მინისტრის საათის“ ფორმატში, სამინისტროს მიერ 2021 წელს გაწეული საქმიანობისა და სამომავლო გეგმების შესახებ ისაუბრა. ამის შესახებ ინფორმაციას შსს ავრცელებს.

უწყების ცნობით, ანგარიშის წარდგენამდე, ვახტანგ გომელაურმა 12 მარტს, რიკოთის უღელტეხილზე მომხდარი ავტოსაგზაო შემთხვევის დროს გარდაცვლილი პოლიციელების ხსოვნას პატივი მიაგო და მათ ოჯახებს კიდევ ერთხელ მიუსამძიმრა.

შინაგან საქმეთა მინისტრი ასევე გამოეხმაურა უკრაინაში მიმდინარე მოვლენებს და უკრაინელ ხალხს მხარდაჭერა გამოუცხადა. მისი თქმით, საერთაშორისო საზოგადოებამ და მსოფლიო ლიდერებმა ყველაფერი უნდა გააკეთონ იმისთვის, რომ ეს ომი, რაც შეიძლება მალე დასრულდეს.

„საქართველოს მთავრობა პოლიტიკურად ყველა საერთაშორისო დონეზე მხარს უჭერს უკრაინას, ამასთანავე, საქართველოდან შეუფერხებლად იგზავნება ჰუმანიტარული დახმარება“, - განაცხადა შინაგან საქმეთა მინისტრმა.

ვახტანგ გომელაურმა აღნიშნა, რომ რეგიონში მიმდინარე მოვლენების პარალელურად, შინაგან საქმეთა სამინისტრო, თავისი კომპეტენციის ფარგლებში, ყველაფერს აკეთებს, რათა ქვეყანაში უზრუნველყოფილი იქნეს მართლწესრიგი და უსაფრთხოება, ასევე, ყველა შესაძლო პრევენციულ ღონისძიებას ახორციელებს, რათა მაქსიმალურად იქნეს დაცული საქართველოს სახელმწიფო საზღვარი.

,,შინაგან საქმეთა მინისტრმა გასული წლის საქმიანობის მიმოხილვისას ხაზი გაუსვა, რომ 2021 წელს, უწყების ეფექტიანი მუშაობის შედეგად, წინა წელთან შედარებით, დანაშაულის გახსნის მაჩვენებელი 35.5%-დან გააუმჯობესდა 49.8%-მდე, ასევე, გაგრძელდა მძიმე და სიცოცხლის წინააღმდეგ ჩადენილი დანაშაულების კლების ტენდენცია.

ვახტანგ გომელაურმა ასევე აღნიშნა, რომ სამინისტროში 2021 წელს, ბოლო წლების განმავლობაში პირველად, განხორციელდა ყველაზე მასშტაბური გადაიარაღება, გარემონტდა და კეთილმოეწყო 20 შენობა.

მინისტრის თქმით, 2022 წელსაც აქტიურად გაგრძელდება შინაგან საქმეთა სამინისტროში რეფორმები, ინფრასტრუქტურისა და აღჭურვილობის განახლება.

ანგარიშის დასასრულს, ვახტანგ გომელაურმა მადლობა გადაუხადა თითოეულ თანამშრომელს საზოგადოებრივი წესრიგისა და ქვეყნის მშვიდობიანი განვითარების მიმართულებით დაუღალავი შრომისთვის", - აღნიშნულია განცხადებაში.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი