2021-06-01 15:58:16, 1046 ნახვა

---

მარიამ ქვრივიშვილი: ჩვენი გუნდის ამოცანა იქნება, პირველ რიგში, სწრაფად დავუბრუნდეთ კოვიდ-პანდემიამდელ ნიშნულს, მათ შორის ავიარეისების მიმოსვლის კუთხით

„ავიაციის, ტურიზმის და მთის კურორტების სექტორების განვითარების ხედვა არის როგორც მოკლევადიანი, ისე გრძელვადიანი. მოკლე ვადაში ჩვენი ნომერ პირველი ამოცანაა, რომ სწრაფად შევძლოთ და დავუბრუნდეთ იმ ნიშნულს, რომელიც პანდემიამდე გვქონდა. პანდემიამდე საკმაოდ შთამბეჭდავი მონაცემები გვქონდა, რისთვისაც ყველამ, კერძო სექტორთან ერთად ბევრი ვიშრომეთ, ვიზრუნეთ", - განაცხადა ეკონომიკისა და მდგრადი განვითარების მინისტრის მოადგილე მარიამ ქვრივიშვილმა ტელეკომპანია ტვ-პირველის გადაცემა „საქმიანი დილა"-სთვის მიცემულ ინტერვიუში.

თუმცა, როგორც მან აღნიშნა, პანდემიამ ამ პროცესში თავის კორექტივები შეიტანა და დღეს უწყებას უკვე უწევს არსებულ რეალობასთან სწრაფად ადაპტირება, პრაქტიკულად, ნულიდან დაწყება.

 „აქ თავისი სირთულეებიც შემოდის, რადგან ერთია ქვეყნის კერძო სექტორის მცდელობა, რომ სწრაფად დაუბრუნდეს კოვიდ-პანდემიამდე ნიშნულს, თუმცა აქ არის გასათვალისწინებელი სხვა ფაქტორიც, რაც გულისხმობს გლობალური ვაქცინაციის ტემპს. და მეორე - გლობალურად ავიაციის სექტორი ძალიან დაზარალდა და ეს საერთაშორისო საზოგადოებაში უკვე შეფასებულია, როგორ უპრეცედენტოდ მაღალი დარტყმა ავიაციაზე. ჩემი, ჩვენი გუნდის ამოცანა იქნება პირველ რიგში, რომ სწრაფად დავუბრუნდეთ კოვიდ-პანდემიამდელ ნიშნულს, მათ შორის ავიარეისების მიმოსვლის კუთხით - სიხშირეები, ახალი მიმართულებები, ჩვენი პარტნიორი ავიაკომპანიების დაბრუნება ჩვენს ბაზარზე" - აღნიშნა ეკონომიკის მინისტრის მოადგილემ.

 ამასთან, მარიამ ქვრივიშვილის თქმით, ავიაციის დარგის სტიმულირებისთვის პირველ რიგში გარდამტეხი და გადამწყვეტი იქნება ქვეყნის და შესაბამისი უწყებების პროაქტიულობა იმ მოლაპარაკებების რეჟიმში, რომლებსაც ყოველდღიურად აწარმოებენ პარტნიორ ავიაკომპანიებთან. მან ასევე აქცენტი გააკეთა ვაქცინაციის ტემპისა და საემიგრაციო რეგულაციების მნიშვნელობაზე. მინისტრის მოადგილის განმარტებით, ის საემიგრაციო რეგულაციები, რომლებიც საქართველომ შეცვალა საჰაერო გზით შემოსული მგზავრებისთვის, იყო პირველი სამოტივაციო ბიძგი, რამაც განაპირობა ის, რომ დღეს ქვეყანა უკვე დაუბრუნდა დაახლოებით 55%-ს იმ ნიშნულისა, რომელიც 2019 წელს გვქონდა.

 „ის, რომ მთელი მსოფლიოს მასშტაბით, ნებისმიერი ადამიანი, რომელსაც ვაქცინაციის სრული დოზა აქვს ჩატარებული და საქართველოში შეზღუდვების გარეშე მოფრინავს - არის უდიდესი სტიმული არამარტო ჩვენი ქვეყნის ტურიზმის ან ავიაციის ინდუსტრიისთვის, არამედ თავად ავიაკომპანიებისთვის, იმიტომ, რომ ეს მათთვის უკვე გადაზღვეული რისკია, რომ ეს მიმართულება აღადგინონ. და მეორე - მათ, ვისაც ჯერ კიდევ არ აქვს ვაქცინაციის სრული დოზა ჩატარებული (დაახლოებით 50-მდე ქვეყანაზეა საუბარი და ყოველდღიურად ემატება ახალი მიმართულებები ამა თუ იმ ქვეყანაში არსებული ეპიდ-ვითარებიდან გამომდინარე),   ვალიდური პისიარ ტესტირების რეჟიმით და საქართველოში ყოფნის მესამე დღეს ტესტირების რეჟიმით ამ მგზავრებს სხვადასხვა ქვეყნებიდან უკვე ეძლევათ საქართველოში შეუზღუდავად შემოსვლის შესაძლებლობა. ეს იყო პირველი, შეიძლება ითქვას თამამი და მთავარი განაცხადი, რაც პროაქტიულად გაკეთდა ჩვენი მხრიდან“, - აღნიშნა მარიამ ქვრივიშვილმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი